كتب / وائل الشويخ #رسالة_للحكومة الغلابة بيموتوا
واتمنى رد من رئاسة الوزراء .سيادة رئيس الوزراء
بص ياريس انا هادخل فى الموضوع على طول
حضرتك انا مش هاتكلم فى مشاكل كبيرة
انا حضرتك مايفرقش معايا مجدى مكين مين اللى قتله ولا رچينى ولا العاصمة الجديدة ولاقناة السويس الجديدة ويتحرق الجنيه ع الدولار ولا ان تيران وصنافير مصرية ولا سعودية لانها مصرية واذا خدوها دلوقتى مسيرنا هانجيبها تانى انا مشاكلى بالنسبة للحكومة اتفه من كدة
البيضة بقت بجنيه ونص انت مُدرِك ..
العدس مابقاش للفقرا ..
وجبة الفول ع العربية بعد ماكنت بخمسة بقت بسبعة البامبرز زاد ٤٠٪ اه وربنا ده غير لبن الأطفال المجفف
التونه بقت ب 30 جنيه
البصل و البطاطس ب ١٠ جنيه
سندوتش البطاطس برا بقي بـ 5 جنيه بقينا نجوع بجد
اكل الغلابه غلي اوي يا حكومة مش هقولك عيزين لحمة
وفراخ ابسط حقوقنا مبقتش موجودة متجوش علي اكل الغلابه يا حكومة متجوووش علي اكل الغلابه
طيب الناس الغلابه اللي كانو بيتغدو بطاطس مقليه و شويه فول هياكلوا ايه ؟؟ ؟
ده غير الزيادة اللى بيزودها التجار
انت عارفة ياحكومة ان المرتب بتاع المواطن بقى بيجيب تلت الحاجة اللى كان بيجيبها الاول
وكأن اللى بيقبض ١٠٠٠ بقى بيقبض ٣٥٠
طبعا مش هاقول على المواصلات وانها زادت برضه ماهو صحيح ماكله زاد يعنى جات على دى..
واكيد فكرة اننا نوفر مابقتش موجودة لان اللى جاى بقى اقل من اللى رايح
والشاب اللي عايز يكمل نص دينه والبنت اللي عايزه تعمل جهاز بسيط .. دي بقيت احلام شبه مستحيله … لما انتخبنا حضرتك كنا عايزينك تخرجنا من الدمار اللي كنا فيه يا ريس
مش ندخل علي مجاعه ومجزره علي لقمة العيش البسيطه !!
طب نسبنا من الاكل في ناس بتموت بتتمني بس تلاقي حق الدوا الي غلي بيتقطعو كل يوم من الالم جرب تنزل القصر العيني .. فـ حالات لا يعلم بها الا الله الدوا غلي والناس مش لقيه تاكل .. والتعليم ف الارض
كل اللى عايز اقوله لحضرتكم ان المواطن الغلبان تعب اوى سواء معاه فلوس او مش معاه مفيش حاجه بتكفي و المفروض يكون ده من اولوياتك ياسياده رئيس الوزراء #الناس_بتكلم_نفسها يعنى دلوقتى نمووت من الجوع ما ناكلش ولا نولع في البلد ولا نعمل ايه الواحد فعلا تعب
هتتحاسب قدام ربنا علي كل واحد فينا جاع ومعهوش فلوس تكفي وكل واحد تعب ومعهوش تمن العلاج الي سعرة بقي الضعف .. ولسه عايزنا نستحمل تانى
