متابعة علاء ثابت مسلم
بمناسبة عيد الأم يا سادة يا كرام بدأ الأعضاء في الفيس بوك بتنزيل و نشر صور و بوستات و فيديوهات عن الأم .. و إحنا كشعب عربي عامة و مصري خاصة أصحاب دم خفيف .. أه و الله بجد.
ممكن من نكتة عادية نعمل منها عشرة و مش بس كده ! ده كمان تحتار تختار أي واحدة منهم علشان تنشرها انت بنفسك.!!
سألت نفسي :
_ هو ممكن يحصل الموقف ده معايا و أن جوز بنتي يقول عني في غيابي نكتة زي كده؟!
و راجعت نفسي و مواقفي مع جوز بنتي و كانت كالآتي:
* بسأل عنه دايما و بحب أعرف هو لبس إيه و أكل إيه و مرتبه كاااام و صرف منه قد إيه و اتبقى معاه كام .. بيروح فين و بيجي منين .. و قد إيه اتأخر في الشغل و برن عليه حتى و هو مع عملائه و لازم يجيني يسلم عليا كل يوم بعد ما يطلع م الشغل مع أني معنديش أسانسير يطلع لسادس دور على رجليه و بيجيني من المنشية للعصافرة و يرد تاني ع سيدي بشر لبنتي .. و كمان براقبه في الفيس بوك و بعلق على بوستاته و بجد بشوفه راجل محترم و دايما يكتب عني و عن بنتي (إللي هي مراته) أحلى كلام.
بس لقيت واحدة صاحبتي بتقولي روحي الفيس شوفي جوز بنتك كاتب عنك إيه؟
دخلت ملقتش حاجة ناشرها جديدة .. كل إللي نشره من يومين.. اتصلت بيها و سألتها يمكن تقصد حد تاني.. لقيتها مصممة على كلامها و بتقولي يمكن عامل لي اخفاء علشان مشفش المنشور.
طبعا شغلت مخي شوية و قمت عملت أكونت جديد و باسم مستعار و بعت له طلب صداقة .. و بسلامته وافق لما شاف صورة البروفايل إللي نقتها إللي لو شافها أي راجل لازم يضفني. (دهاء أنثى بقه).
المهم شفت البوست و كانت مفاجأة.. تعرفوا كاتب فيه إيه؟
كاتب (إللي عايز يهادي حماته في عيد الأم يرجع لها بنتها).
ياااالهوووووي بقه يا راجل عايز تهاديني بطلاق بنتي؟!
علقت عليه بالشخصية الجديدة و سألته:
_ و إن كانت أمها ميتة هتعمل إيه لبنتها.. هتموتها على كده؟!
رد عليا و بسرعة :
_ للأسف هي حية و مش بتموت أبدا و أسكتي لأحسن تشوف البوست ده .. اللهم اجعل كلامنا خفيف عليها.
مش عارفة أقولكم دمي فار و لا ضغطي علي عليا و لا سكري ضرب .. و مش عايزة أكشف نفسي له و كلمته ف التليفون في الحال و سألته هتجيب لي إيه في عيد الأم يا حبيب قلب حماتك .. كلها تلات أيام و عيد الأم جااااي.
رد عليا بصوت حنين زي صوت عبدالحليم في فيلم الخطايا و هو بيحضن حسن يوسف في المستشفى و بيوصيه على أمه:
_ يا نهار أبيض يا حماتي .. الدنيا كلها ليكي . ده أنا كنت بتكلم مع واحد صاحبي حالا و بقوله يقترح عليا بهدايا للملاك الناعم حماتي .. أه و الله يا أحلى الحموات.
شفتم الراجل! فعلا أسمع كلامك أصدقك أشوف بوستاتك في الفيس أستعجب!
و شوفوا كمان حبيب قلب حماته بيراسلني في الفيس ع الأكونت التاني و بيقولي .. تصدقي بدأت أشك أن حماتي دي بتاعة ربنا بجد .. دي اتصلت بيا في الوقت إللي كنت معاكي فيه و بكتب عنها .. يا خوفي لتطلع بنتها هي كمان بتاعة ربنا .. بكده بيتي هيتخرب.
طبعا هو وسوس لي بالفكرة.. قمت اتصلت ببنتي و قلت لها أن فيه واحدة في الفيس قالت كذا و كذا
و خذي الأميل بتاعي ده و ادخلي منه بس بذكاء يا شاطرة.
البنت ما كذبت خبر و دخلت و شافت الدردشة كاملة و خططت له خطة إنما إييييه !.. طلعت بنت شياطين و أنا مش واخدة بالي.
طلبت منه يبعت صورة حماته و مراته و هي بتهزر معاه جامد و هو يا ولدااااااه فاكر نفسه جون ترافولتا .. و بعت لها صور ليا بس عاملي فيها قرون و أنياب كأني دراكولا و لا شيطان .. و صور بنتي و هي لابسة لبس جزارة ف مدبح و كلها دم.
طبعا الموضوع كده يلزمنا أننا نتدخل .
تشاورت أنا و بنتي و بعتت له صورته متركبة على صورة راجل راكب عربية كارو و عليها أقفاص فراخ و شوية جزر.. و صور و هو بيشحت.
طبعا سأل منين جابت الصور قالت له :
مراتك نشرتها في الفيس بس أنت مش هتشوفها علشان عاملة لك إخفاء.
عمل أكثر من خمسة أكونتات و برضه مش شايف حاجة لدرجة أنه هيتجنن . رجع البيت سأل بنتي عن الباسورد بتاعها علشان يدخل يشوف المنشور.. قالت له هات أنت الباسورد بتاعك الأول علشان أشوف أنت ناشر إيه.
كلمة منه و كلمة منها لقيتها جاية بشنطة هدومها .. عرفت أنها خلصت عليه ..دي بنتي و أنا عارفاها.
و أنا بحتفل بعيد الأم و قبل ما نطفي الشمع جاء جوزها و قدام الناس و اعتذر و باس إيدي و عطاني الموبايل و الأكونت لغاه و جايب معاه ورد و ساعة رادو حريمي روعة تساوي حوالي عشرتلاف جنيه.
سألت البنت أنتي عملتي فيه إيه خلاه كده ؟
قالتلي بسيطة يا ماما قفلت عليه باب الحمام بالمفتاح و قطعت عنه الكهربا و قفلت محبس المية .. و قفلت باب الشقة بالقفل و قلت للجيران أن أي صوت يسمعوه ف الشقة ميهتموش بيه علشان الشقة مسكونة عفاريت و أنا رايحة أجيب مشايخ علشان يصرفوهم.
النهاردة الصبح قبل ما أروح الشغل فتحت عليه الباب و وديته المستشفى و قلت له .. لو كنت تايب تعالى على بيت العز .. و بسسسسس.
عايزة أقولكم بجد .. كان أحلى عيد أم في الدنيا كلها .. و من يومها بقى عسكري مخلة في خدمة القائد مراته و اللواء حماته.
أل يرجعلي بنتي أل.
بدعيله دايما و بقوله و أنا بكز على سناني :
ربنا يخليني على قلبك يا جوز بنتي .(سالمة المغربي)
========إلى اللقاء في فضفضة جديدة
