………………
شهقت جراح الزمن
زفرت آهات بكرة
جاد الحنين بالشجن
جدد جراح ذكرى
والراعى لو مؤتمن
هيموت على الفكرة
تبدأ حكاوى القهر
من يوم ما نال الفقر
م العرض والهمة
يوم مايطاطى العباد
علشان يسوق عواد
ويصير زعيم أمة
يتوضى شيخنا بدم
وفرحنا حاضن هم
ووطنا يبقى الأم
والجنة مش تحته
أنا جرحى فَتحتٌه
علشان أشيل القيح
خلينى مرة صريح
وأواجه الأزمة
والأزمة ف سكوتى
وأنا صوتى ليه أتخرس
وذِلتى فى قوتى
والقوت بإيد الحرس
ده اللقمة والعيشة
ربى اللى رازقها
وغرغرة روحى
بإيدينه مالكها
ماعدش ينفع أحيد
بصرى هيبقى حديد
وأمر كن فيكون
كله بإيد مولاه
عيشوا عبيد فرعون
وإحنا عبيد لله
بعتونا أرض وعرض
علشان أمان زايف
خايفين خلاص م الموت
أنا موتى يعنى سكوت
لو زدت ف الجبروت
قميصى ماتزررش
مابخافش ليه ما أعرفش
حتى الردى خايف
درس التاريخ محفور
جوه القلوب بالنور
والشهدا ساكنة قبور
وأهى غزة بتعلم
والعزة بتعلم
لو حتى تتألم
ضحكة رصاص بغداد
تسكن نفوس حُرة
حتى اسألوا الدُرة
زرع فى أرضه الغضب
علم عدوه الأدب
دم الضحايا فى حلب
يحنى فى هامات العرب
ويلوث النياشين
بس أنتو مش فاهمين
فاكرين عروشكم دهب
بس الجسد من طين
يا عُصبة المنصر
هتوضى ف الأزهر
وهصلى ف فلسطين
وهموت ميِتينْ(٢٠٠) مرة
بس العراق حُرة
وسوريا منتصرة
وعروشكوا منكسرة
حاسبينها بالقوة
وبالعتاد والجاه
هتوضى من دمى
وأهى دعوة من أمى
أنصرنا يا الله
ميت على شهادة
بتحنى بسعادة
والعزة بزيادة
نورها يزين ف جباه
لكن فى عينى بأقٌل
علشان عايشها بذل
ومين بقى يصدق
جندى يسيب خندق
راجل يبيع مبدأ
ونعيش كما الأموات
ده مركبى طايش
سارى الرجال بايش
مستنى بر نجاه
ميت أنا ف جلدى
لكن ببان عايش
على قيد الحياه
……………………..
