انا راجع .. بقلم الشاعر/ مصطفى المنشاوي

من بين الزحمة ف عصر غريب

انا قلت اتشعبط في الماضي

ما انا أصلي مليش في اللعبادي

و لا ليا مخالب و لا خربوش

و لا ليا دروع

بتصد الغل المتزوق في وجوه عرابيد

و لا ليا الحيلة اللي بتعزف على وتر الزيف

انا أصلي قديم و فضلت عليل

متمسك بسطور أوراقي

وبعيد في كتابة أيامي اللي سرقها الخوف

والساعة سئيلة ف دورانها أنياب وتروس

وبتطحن أوقاتي الجاية

والحرب عنيدة وضروس

انا حابب أكتب في رسالة

وتفوت على كل الرحالة

اياك تتعود ع الغيبة وعلى كتم الصوت

راح تبقى عجينة وبالعيبة هتعيش وتموت

واتمرد على كل مقاول راح يسرق مونة أيامك

راح يبني صروح من راسمالك

والسخرة دوام للي يفرط في الذات والقوت

ودماغك راح تبقى رهينة

لإدين مسعورة بملاوينة

راح تطوي ف أحلامك طي

انا عايش بتأمل لكن مش فاهم في اللوغاريتمات

وبحس ان ف عمري الماضي كان ليا أغاني وحكايات

وعشان الحاضر بيخالف بستغرب من لغز دفين

انا حاسس بالحلم وعاجز

وخريفي المعزول في أنين

جوايا شعوب قاعدة تنادي بكسوة وجناحات

وتطير من حبسة أوجاعي والحلم ساحات

لكن في الحاضر متغرب والأسر عنيد

مش لاقي الواحة اللي تقدم للعمر جديد

ومشاتل طرحت غربان

ومعاها دواهي وأوثان

بتعود في الناس تتعبد في دينارها وتركع للجان

بيبيعوا المساخيط وبتركب فوق راسنا وتلبس رهابين

وبتبني مسارح ومطارح

وتخربش في رخام الدين

وبتحرق في كتاب الماضي

وتحلل عرش الطغيان

انا راجع بتشعبط تاني

في الماضي وحاسس بزماني

وبريء من حاضر بهتان