كتب عبد التواب مسلم
هو من المكفوفين المبدعين دائماً والمنتصرين على إعاقتهم بعدما أبدع ما جورج قرداحى مؤخراً فى برنامجه الشهير من سيربح المليون تعالوا نرى ماذا كتب على صفحته اليوم بالفعل شئ مخزى لسؤ تربية الاطفال،
حيث قال
يوم ما أقرر أتمشى شوية أتبهدل وأتزف زفة محترمة دا ملخص الموقف اللي حصل معايا وأنا راجع النهاردة من الشغل حبيت أخرم من الشوارع على شان أتمشى شوية يمكن أفك عن نفسي وعديت في شارع جانبي كان فيه كم طفل في إعدادية تقريبا بيلعبوا وصلت لعنديهم حسيت نفسي في وسط دايرة قلت أكمل وقلت لهم لو سمحتم عدوني لقيت حد منهم قال عدي وهو احنا حشناك وأنا بعدي من بينهم لقيت واحد راح شايت العصاية بتعتي وحد تاني بيشد شنطتي اللي على كتفي وحد تالت بيشد الهاند فري من وداني اللي أخد العصاية أخدها وجري عافرت مع الإثنين وزقيتهم بعيد عني وبمشي بسرعة على شان أحصل اللي أخد عصايتي وطار لقيت مياه اتدلقت على ظهري مهتميتش قلت أكمل على شان أحصل اللي خد العصاية لقيت حد راح شاددني من التيشرت وقعت على الأرض لقيت حد منهم بيقول للواد اللي أخد العصاية ياد عيب هات العصاية بتاعة الراجل جابها وجاني وأنا بلم في حالي اللي اتبعتر على الأرض وبيقولي خد عصايتك بقوله شكرا وبمد يدي آخدها منه راح خابطني بيها على راسي ورماها جنبي وجري وهو بيضحك أخدت علبة مناديلي ومسكت العصاية وقمت لقيتهم بيضحكوا ولما قربت ناحيتهم قررت أجري وهم جريوا ورايا وهم بيقولوا الأعمى العبيط أهو بعد مسافة قرروا يعتقوني ويسيبوني في حالي خرمت على شان أطلع على الشارع الرئيسي وطلعت وأنا في حالة ذهول لقيت نفسي طبعا تيشرتي مبلول وبنطلوني وحالتي متسرش حد وقفت نشفت نفسي بالمناديل على قد ما قدرت ومشيت وأنا مش عارف أنطق وحتى لما عملوا دا كله منطقتش لأنه مهما كان الكترة تغلب الشجاعة وحيبقى الموقف زيادة عن كدة حمدت ربنا أنه مفيش حاجة ضاعت مني أو اتعورت.
مأعتقدش أني على شان بمشي لوحدي وبعصايتي إني غلطان أو دا عيب المفروض معملوش ومش حيحصل أني أفرط في استقلالية حركتي ولا حأتنازل عنها مهما حصل.
