كمالة عدد
صعب أبقي كمالة عدد
وياريت حتي كمالة عدد
ده كأني صفر عالشمال
صعب أكون دور مش أنا
صعب أكون من غير لزوم
صعب أستسلم للهوان
ولا أرضي بالهموم
وإن رضيت يوم الإغتراب
رضا بالقدر وبالمقسوم
صعب أرتضي يوم الخضوع
ولا عاش اللي يحولني لذليل
دا أنا اللي أقهر المحال
أقول للشمس ميلي تميل
عاشق سابح في الخيال
ولا أعرف يوم المستحيل
حالم بحب مالوش حدود
وزاهد و راضي بالقليل
أنظر أنا لنجم السما
ينزل هنا
في كفي اللي متحني غرور
أنا اللي أتعودت أشاور
للفرح يمحي العذاب
وينسي الآلام
وينشر في عز الضلمة نور
إزاي أسمح لقلب باعني
يشتريني بالوعود
ولا بكلام جميل
ولا بشوية قشور
أنا كنت ولسه زي ما أنا
في السما بدر البدور
مهما طال الزمن
ما أنحني
ولا أنثني
ولا أبات في يوم مقهور
صعب أكون كمالة عدد
ولو حتي في تعداد القبور
صعب أنا
صعب المراس
صعب التقليد
صعب القياس
أنا متفرد في وسط عالم
عاشق حرية الطيور
صعب أكون بداخل سجن
ولا أسكن جوه سور
حر أنا
مثل الهوا
مثل السحاب
أهوي تغريد الطيور
عصفور وعايش طليق
يهوي العلا
والتحليق زي الصقور .
بقلم / كواعب أحمد البراهمي
