اقلعي اللبان يا مُنمن
اقلعيه من غير كسوف
اقلعيه ثورة ورسالة
خلي كل الناس تشوف
اصلنا ناقصين رباية
محتاجين ارشاد سيادتك
فيلم بيناقش قضايا
زانقة وسط الناس بأستك
والقضية المرة دية
الكلام فيها خطر
عن خبايا وعن خفايا
والضمير اللي انحدر
شلة صايعة وكل واحد
في الخفا مستور وعايش
اللي خاينة واللي صايع
واللي شاذذ واللي طايش
ربنا ساتر حياتهم
واهي ماشية وفي التمام
فجأة زال الستر عنهم
طلعوا شلة ولاد حرام
فيهم اللي بنته صايعه
وهو شايفها بعيونه
حتى زوجته مرافقه صاحبه
والبعيد رافع قرونه
واللي جوزها له عشيقة
واللي شاذ ومداري حاله
واللي جوزها مش طايقها
وقال يعيش علشان عياله
ميت حكاية وميت رواية
موجودين والكل عارف
بس ستر اللهً ساترها
وربنا وحده اللي شايف
ايه بقى الحكمة الخفية
للي جاي وللي رايح
نقلب الموضوع قضية
وفيلم مليان بالفضايح
فيلم مليان بالشتايم
سب دين وكلام منيل
يعني لو عاوز تشوفه
اوعى تقعد جنب عيل
فيلم بيقولك براحتك
شذ صيع رافق وعيش
والشرف لو يوم يضايقك
قول ده كخة ومايساويش
بس كله كوم يا مُنمن
وانتي يا أندر زمانك
كوم لوحده قال رسالته
وحكمة الفيلم فلبانك
