كتبت هدي الصياد
قام أحمد حسن، عميد لاعبي العالم، نجم المنتخب الوطني وقطبي الكرة المصرية ، بزيارة مريم الحاصلة على مجموع 99% في نتيجة الثانوية العامة، والتي أطلق عليها مؤخرا «الدكتورة بنت البواب»، والتي أكدت مدي فخرها بوظيفة والدها، وانه له فضل كبير عليها، وانه هو السبب فيما وصلت إليه.
وحرص «الصقر» على سرد كواليس الزيارة عبر حسابه الشخصي على موقع التواصل الاجتماعي «فيسبوك» قائلا : يوم مع الدكتورة مريم وعائلتها ، حابب اتكلم عن نموذج مشرف وحترم وهتكلم من قلبي .. شوفت الصديق سامي عبد الراضي اول ما نزل قصة مريم ونجاحها في الثانوية بنسبة 99% وهي بنت حارس عقار بسيط ولكنه كبير مقاما وعفيف النفس اتصلت مباشرة علي سامي وقولتله عايز ازور مريم وأبوها ، وشوفت اد اية مريم فخورة بأبوها وأمها وأهلها .
وأضاف : وبما إن ده مجتمعنا وأصبحت دي نظرة المجتمع ، فنفس الشئ ينطبق علي اعلام اعمى عن رؤية النمادج المشرفة ، تفتكروا حد النهاردة هيجري ورا مريم ويدفعلها فلوس عشان يستضيفها ويطلعها كنمودج مشرف فهي بنت حارس العقار البسيط وعندها اربع اخوات وفي غرفة واحدة قدرت تتحدى كل الصعوبات وتجيب 99% !! أكيد محدش هيعمل كدة عشان أصبحنا في زمن التفاهات والهلس ، نموذج زي مريم أكيد ما يجروش وراه ، لكن طبعا يجروا ورا نماذج التعري التانية ، اللي كل ما تتعرى أكتر يدفع لها اكتر ، فتتعرى اكتر فيدفعلها تاني اكتر ، وللاسف هو ده بقى حال مجتمعنا واعلامنا .. طب ما انا عندي فكرة ما نقدم نموذج زي مريم ، ويبقى عندنا نموذجين نموذج للتعري ونموذج محترم تحدى كل الصعاب ونسيب الناس هي اللي تختار .
وأعرب عن بالغ سعادته بهذه الزيارة قائلا : أنا مبسوط جدا إني زرت العيلة دي وانا فخور ببنت زي دي وبعيلتها، ليا صور كتير بعتز بيها وبكون فخور بيها ولكن الصورة دي هحتفظ واتشرف بيها، وكمان هكتب تحتها شكرا لمريم انها اتصورت معايا عشان والله ومن قلبي أنا كنت أتمنى إن نموذج مريم ده تكون اختي او بنتي، باصرارها وعزيمتها وطبعا ادبها واخلاقها وتربيتها عشان كنت هطلع واقول دي اللي شرفتني، أكيد في مئات زي مريم، محتاجين حد يظهر النماذج دي عشان نعلم ولادنا معنى النموذج المحترم، شكرا للدكتورة مريم، وشكرا للحاج سعيد الراجل المحترم .. وهما دول الناس الحقيقين وهما دول ولاد الناس الحقيقين”.
