جمال شعبان: بين عبقرية الطبيب وتواضع العالم .بقلم .. هشام صلاح

الدكتور جمال شعبان رحلة طويلة لطبيب وعالم ذاع صيته وعرفه الجميع متخصصا في علاج أمراض القلب وأنشأ وحدة لكهرباء القلب بالمعهد القومي للقلب أصبحت الآن أكبر قسم لرابطة كهرباء القلب في مصر والوطن العربي

وقد فاز الأستاذ الدكتور جمال شعبان أستاذ طب وجراحة أمراض القلب بمعهد القلب القومي ورئيس شعبة كهرباء القلب المصرية بجمعية القلب المصرية وزميل جمعية القلب الأوربية وزميل جمعية قسطرة القلب الأمريكية، بجائزة ” طبيب الانسانية” تقديراً لدوره الخيرى والانسانى بعد تدشين عدد من القوافل الطبية العلاجية بالمناطق الفقيرة والأكثر فقراَ فى عدد كبير من محافظات مصر,.ومع تحفظنا على قرار وزيرة الصحة ” هالة زايد ” بإقالة البروفسيور جمال شعبان من منصبه كعميد لمعهد القلب وما أثاره من جدل يصل حد الرفض من طوائف المجتمع إلا ان الرجل لم يعبأ كثيرا بهذا القرار ولم ينزوى على نفسه بل زاد نشاطه وجهده لان الطب عنده ليس مهنة يشغلها إنما هى رسالة إنسانية أيقن أن الله تعالى قيده لها ولهذا آثرت ألا نلقى فى مقالنا الضوء على الجانب الإنسانى فى حياة الرجل فالأكثرية تعرف جيدا تلك الجوانب الإنسانية المتعددة التى تطل من شخصيته لكن سنلقى بعض الضوء على جانب من جوانب تواضع الرجل وعدم حجبه بما لديه من علم عن صغار الأطباء والممارسين

فطالعت على صفحته الشخصية مقالا كتبه ليقدم فيه بعض النصائح والارشادات للاطباء القلب جاء تحت عنوان قواعد طب القلب الأربعون “

قال فيه :

١ لو انت مش بتاع شغل ونفسك مش طويل ما تاخدش قلب

٢ لو انت مش من النوع الصبور طويل البال وبتعرف تقول حاضر ياباشا تمام يا أفندي ما تاخدش قلب لان السينيور بتاعك في النوبتجية دا اهم من ابوك واللي جابوك ادي له وضعه يديك عينيه

٣ اوعي تفتكر انك موظف تمشي بانتهاء وقت النوبتجية عندك حالات بدأتها لازم تنهيها قبل ما تسلمها لان التطبيق ومتابعة الحالة ممكن يفتح لك باب primary intervention

٤ اتعلم تسلم وتستلم علي مانفيستو… التسليم الكتابي ه يمنع عنك بلاوي كتيرة

٥ تمريض الطواريء ايديك وعينيك دلعهم يدلعوك

٦ في اي حالة Arrest خليك في الصدارة تركب التيوب وال سي ڤي پي دا مدخلك للقسطرة

٧ اي حالة بيسميكر مؤقت ارشق فيها

٨ عيان القلب انسان مكروب اعتبره والدك او قريبك اتعلم تطبطب عليه يا چنتل

٩ لازم تتعلم السياسة والقاء البيانات بلباقة لأهل العيان

١٠ اوعي تحسس اهل العيان في الطواريء انك زهقان او غير مهتم وإلا ه تجيب الضرب ليك وللسينيور ومش بعيد يكسروا لك الوحدة يا معلم

١١ ما تدخلش الامن بينك وبين اهل العيان لو مش عايز تتضرب

١٢ اوعي تزحلق عيان علشان انت تعبان

١٣ اتعلم تاخد شيت بأدق التفاصيل

١٤ لوانت مش خريج لغات لازم تعلم نفسك انجليزي وتنطق كويس لأن دا بوابتك للمحلية والعالمية

١٥ اتعلم ازاي تعمل پاور وبنت پريزنتيشن تفك زنقة السينيور في محاضراته

١٦ اوعي تعتمد علي رسم القلب بس في حالات اوجاع القلب لازم تعمل رسم القلب مرة واتنين وتلاتة والإنزيمات مش هي اللي بتحدد الدوا المذيب للجلطة ولا القسطرة خد اكشن بناء علي الاس تي

١٧ انت بتعالج عيان مش مونيتور قبل ما ترزع العيان دي سي شوك أتأكد ان دا مش ارتيفاكت

١٨ قبل ما تحكم علي العيان baseline راجع كذا لِيَد وبص ع العيان

١٩ قبل ما تدي الدي سي أتأكد انك بعيد عن السرير علشان ما تتلسعش يا معلم

٢٠ لو تشخيص الريذم Unknown ما تديش cordarone

٢١ ما تديش ايزوبتين لعيان جاي ب wide complex وتقول دي سوبرا وذ ابريشن او آر ڤي أو تي

٢٢ بلاش تعمل مناقشات بيزنطية علي نوع الريذم والعيان بيروح منك

٢٣ استشير في الحالات الصعبة خبراء كهرباء القلب اللي هم اصلا مش فاهمين هي ايه كهرباء القلب بس علشان تخلص ضميرك

٢٤ اوعي فرحك بالبالطو الابيض وكلمة ايه رايك يا دكتور يخلوك تفتي في مريض لان الغلطة بفورة : الغلطة روح انسان

٢٥ ما تزعلش لو دخلت اوضة كهربا القلب ولقيت شاشة مليانة بالطلاسم لأن تلات ارباع اللي قاعدين في الكونترول رووم اصلا هم مش عارفين هم بيبصوا علي ايه

٢٦ الإي پي إس يا ابني بحر عميق وسكة اللي يروح ما يرجعش لو مالكش زوجة ولا اهل ووارث من اهلك قرشين أتخصص فيه

٢٧ ماتضيعش وقت كتير في الماجستير لان الأقدمية بتحسب بعد الدكتوراه

٢٨ الماجستير هو اكل العيش اوعي تفتكر انك بقيت دكتور قلب بعد الماجستير

٢٩ ما تجريش علي القسطرة قبل صنفرة مخك بالعلم واتقان الطواريء والرعاية.. الدكتور الشاطر في العلم ه يبقي شاطر في القسطرة لان القسطرة قرار اما المهارات الفنية فالممرضة والفني يقدروا يعملوها احسن منك

٣٠ ما تترسمش علي زميلك دكتور الباطنة بمعرفتك في رسم القلب لانه هو اللي يحول لك الحالات بعد كدا

٣١ خلي علاقتك كويسة مع جراح قلب لسببين اولا هو اللي ينقذك من مزانق كتيرة.. ثم انه عزيز قوم ذل

٣٢ لو داخل وفاكر انك بعد سنتين ه تبقي في القسطرة في لمعان عادل امام او الاتربي تبقي واهم يا معلم

٣٣ حاول تاخد رسالة الماچستير حاجة تتعلمها مش تفبركها

٣٥ قبل الماجستير لازم تبقي فراكيكو بتنطط في كل حتة واسأل يمكن تلاقي حد سينيور قلبه يحن ويقول لك كلمة

٣٦ ما تزعلش لو قعدت في اوضة الكونترول رووم في القسطرة فترة طويلة بدون ما تتعقم التعليم يبدا في الكونترول

٣٧ المؤتمرات مش علم وبس لازم تتعلم ت socialize الناس تعرفك وتعرفهم

٣٨ بلاش الله يهديك البدلة ورباط العنق قبل الدكتوراة … دي من مناقب الاستاذية وانت لسه مش استاذ

٣٩ مش كل عيان عنده ارتخاء في الصمام تجيب له اكتئاب وتحسسه انه مريض قلب لانك لو عملت موجات لنفسك ه تلاقي عندك ارتخاء

٤٠ لازم تحب تخصصك وبلاش سربعة ع الفلوس… ما تستعجلش الفلوس هي اللي ه تجري وراك