“طول عمري ما بحبش اللمة الكدابة” بس يعني ايه لمة كدابة؟ هل في مصطلح اسمه كدة بالفعل؟ الحقيقة أني لقيت نفسي بقول المصطلح ده فجأة وأنا بتناقش مع أحد الأصدقاء عن موضوع الصحبة والناس اللي أتغيرت واللمة اللي كانت بتجمعنا بقت هي نفسها اللي بتفرقنا.
سألني هذا الصديق: ليه مابقتيش بتقعدي مع الناس كلها زي الأول؟ لقيت نفسي برد بقوله: أصلي ببساطة “مابحبش اللمة الكدابة”
نظر لي صديقي في استغراب وقال لي: حلو اوي المصطلح ده.. أنا اول مرة أسمعه
ثم نظرت عبر النافذة واستطردت في الكلام وتحديدا في تفسير هذا المصطلح.
هيا بنا عزيزي القارئ نغوص سويا في تفسير هذا المصطلح واسمح لي عزيزي القارئ أن أعتذر منك لكتابتي باللغة العربية العامية المصرية في هذا المقال لأنني أرغب أن يصل إلى قلب كل من يقرأ.
اللمة الكدابة يعني يبقى عندك أصحاب كتيير اوي في كل مكان ولكن تلاقي نفسك وحدك وانت رايح أي مكان!
اللمة الكدابة يعني يبقى عندك اصحاب من كل أنحاء الجمهورية وفي كل المحافظات وأكلت معاهم عيش وملح ولما تحب تخرج ماتلاقيش حد تخرج معاه!
اللمة الكدابة يعني يبقى عندك أصحاب كتير ودايما يلاقوك وقت ما يحتاجولك ولما تحس أنك عايز تتكلم وتفضفض لحد ماتلاقيش!
اللمة الكدابة لما يبقى عندك أصحاب بتتجمعوا سوا تتكلمو وتتناقشوا ولما حاجة تشغل بالك وتفكر فيها كتير وتطلب منهم يتجمعوا عشانك ما يتجمعوش!
اللمة الكدابة لما تحكي حاجة لأعز صحابك وتبقى متأكد أن ده الشخص الوحيد اللي هيفهمك ويحس بيك وبعد فترة تلاقيه أتغير عليك لانه فسر كلامك غلط وأخد منك موقف مش مفهوم!
اللمة الكدابة لما يكون عندك أصحاب وأصدقاء كتير أوي وتبقوا كلكم قاعدين مع بعض أو خارجين خروجة حلوة وكل واحد ماسك تليفونه بيلعب أو بيتكلم في الشات!
اللمة الكدابة لما تبقى متعصب من أتفه الأمور حواليك لسبب أنت وحد عالم بيه وماتلاقيش حد يكلمك بينك وبينه وبحنية ويقولك ايه شاغل بالك ومعصبك!
اللمة الكدابة لما يبقى شكلك متغير وكل الناس بتقولك مالك؟ وانت تقول مافيش.. بس الحقيقة أنك مستنيها من صديق واحد بس أنه يحس بيك ويسألك مالك عشان تحكي وتتكلم عن اللي واجعك ومايسألش!
اللمة الكدابة هي كل موقف بتحتاج فيه لصاحب أو سند أو صديق أو حبيب وماتلاقيهوش!
أنا متأكدة أن كل شخص بيقرأ المقال ده دلوقتي افتكر أكتر من موقف وأكتر من شخص كانوا حواليه أو هو كان معاهم في يوم من الأيام بس في لمة كدابة!
أحنا على أعتاب عام جديد ويارب يكون سعيد على كل الناس في كل مكان .. ونصيحتي ليكم السنادي .. أبعدوا عن اللمة الكدابة .. اهربوا منها حرفيا أول ما تكتشفوا أنها فعلا لمة كدابة.. لأنها مش هتديلكم أي شيء غير الوجع والجرح .. وفي المقابل هتاخد منكم كتير أوي .. هتاخد جزء كبير اوي من قلوبكم ومشاعركم وأحاسيسكم وأفكاركم وأوقاتكم اللي ناس كتير تانية أحق وأولى بيها.. ناس بتكره اللمة الكدابة وفي عرض لحظة صدق واحدة مع ناس حقيقة وصحبة حقيقية ولمة حقيقية.
