ذكريات لن انساها

الشاعر : ياسر التونى 

وحتى الشيب مهوش قادر

يغير نظرتك ليا

انا اللى لسه ف عيونك

يادوبك طفل ف الميَّه

بيلعب بالكفوف وانتى

بتشخطى فيه بحنيه

بلاش اللعب روح اقسم

كده الـ2000على 100

وافتح شنطتى واجرى

واجيب كراسة مطوية

كأنها طالعة من متحف

وتحفة بجد اثرية

واكتب قال وابص لك

كأنى عميد لكلية

والاقى الضحكة ف عيونك

بترسم نجمة مرئية

وتدى عشرة من عشرة

وعالم ربنا النية

بانك يومها كان هدفك

اشيل اليد م الميه

عشان لو لبسى اتبلل

هكح لحد ماعنيا

تدمع والسعال فيا

يزلزل قلبك الابيض

ويدى اجازة مرضية

فيها الدكتور حنان ايدك

وهطلب منك الدّية

لانى قتيل حنان قلبك

يارحمة رب مخفية

ف كلمة ام مدسوسة

فرحت اجيبلها هدية

قالتلى هديتى ياابنى

تجيب ال100 من 100