بقلم عاصم احمد
هتسألنى يعنى إيه تربيعة
هقولك بداية ألف ميل ف بداية طريق
هقولك مواهب حقيقية بدون بطاقة تحقيق
هكلمك عن موسيقى عمر خيرت ..
وعن موهبة ف الشارع دايرة تِشحت
عن ماضى بيألمك ويجعلك ف جاهلك مريض
عن وش شاحب ف المرايا ومليان تجاعيد
وعن فرصة تضيع قدام عينيك
وعن صحاب يفروا من ضياع إيديك
نجحت إزاي ياعم !
عجبك نجاحك إللى شيلك الهم ؟
بالتطبيل والتسقيف كله يهون ..
هاه ! .. مليت بطنك لغاية مابقي عندك دهون !
اهي بطنك اتملت وشبعت تطبيل
روح قولهم ..
قولهم إنكوا لازم تبقوا منافقين
عشان تِرضوا صاحب السلطة إللى ف خيالكوا ؛
وبواقى بنى آدمين مش حاسين
كلمهم عن فن الزمن الجميل ..
قولهم لولا سعاد حسنى
جايز مُكناش نِعرف أهمية أمهاتنا
مكناش عرفنا إزاى ربِتنا وكبرِتنا
وخليتنا رجالة بشنبات
وجاي دلوقتى تقولى ف وشى ..
إحنا آسفين ؛ حلمك مات
أصلى شوفته من بعيد جمب شجرة مليانة شوك ..
ويغني بصوت عالي سلاماتك سلامات
ماتفكرش ف اللي فات
قبل ماتيجى تنصحنى إنى أنسى حلمى
وقبل ماقولك أى كلام غير عاقل يتقال
ماتعملكش موال .
وإنسى فكرت خروجك من وطنك لوطن آخر
لإنك لو تمردت ، هيحولوك لمُلحد كافر
وف نهاية التعريف .
بدون خناقة على وسطى أو على رغيف
ومن غير زعل مانتعبك أكتر من كدة ، كفاية عليك
أحب أقول كلام أخير إليك
أعزائى الموهوبين
الحاضرين منكم والغائبين
معلش إحنا ف مسرحية
مستحيل هتقدرك وتقدرنى عشان غبية
