شوفوا بقي يا جماعة عشان نعدي المرحلة المقرفة دي ، وعلي رأي المثل اللي بيقول ” خليك مع ،،،،،،،، لحد باب الحديد ” والله شكله كده هيخلينا كلنا عينة الأخ بتاع هنومه ونلبس القميص ، ما علينا نعمل إية مش ضروري ناكل لحمة ولا فراخ ولا هامبورجر نجيب ٣٠ كيلو بطاطس ونرميهم تحت السرير وكل شوية نقلي ونحمر وأهي حاجة ترم العضم وناكل فول وعدس أهو فيه نفس فوايد اللحمة ، والحمد لله هنقلي بالذيت بتاع التموين انتو هتفتروا ، وأظن كتر خيرهم لسة العيش الرغيف بشلن ، وأية مع التأكيد إنه هيفضل بشلن أي خدمة ده وعد الحكومة بنت المحترمين قطعتوا علي نفسها ، عقبال ميقطعوا علي لسانهم ، دا الشلن إللي هو الشلن خرج من المعادلة الإقتصادية في مصر بقالو يجي عشرين سنة والله الناس دي محترمة فعلا ، طب والله والله والله إنتوا شعب مفتري وميختشيش دا أنا من كتر ما بشتري الرغيف أبو نص وأبو جنيه نسيت إن الدولة بتبيع ليكوا الرغيف بشلن ، طب والله حكومة مجانين ، ” شلن ” يلهوي ” شلن ” يا خراشي هو صحيح فيه حاجات غريبة معجونة مع الرغيف وإية إستوت معاه كمان ، بس النار بطهر الحاجة ، مفيش داعي أمغص بطنكوا لكن إسمه بشلن ، بس العالم دي أول ما بتقول تأكيد ، الفار بيلعب في عبي ، يعني ممكن الرغيف يبقي ببريزة بربع جنيه حاجات غريبة كدة ، ربنا يسترها علينا يا كريم .
وبعدين يا جماعة قاعدين تتنططوا واتقولوا سكر ومسكرش دا وزير التموين بجلالة قدره كيلو السكر بيقعد عندو في البيت شهر وبيفضي منه كمان ، وده وزير ، ما بالنا بالناس الكحيانة المفروض ربع كيلو كفاية عليكوا ، دا المفروض يتصرف علي البطاقة للأسرة ربع كيلو في الشهر علي البطاقة .
عموما نقاطع كل التجار الجشعين ، يعني مش ضروري تأكلي الواد سريلاك ، مالوا الرز بلبن ، ولازم تجيبي نايتي ودارتي وبدنجاني ، مش ضروري تأكليه خالص ، وان جالوا أنيميا عادي لما يكبر يبقي يتعالج منها ، يدوبك شوية عسل إسود أو أي حاجة سودة وأظن دي بقت في معادلة الحياة بقت كتيييييير ، أقصد السودة ، حياة سودة ، عيشة سودة ، معاملة سودة ، بيروقراطية سودة ، محسوبية بيضة ههههههههههه، المهم ما علينا المهم يتعالج وخلاص ، أما لو جالو سرطان ، فدي بقي إرادة ربنا هنكفر .
مش ضروري نركب تاكسي ولا أوبر ولا الواد كريم ، مش ضروري نورنش الجزم مالها لما نمشي بيها وسخة إية إللي هيحصل يعني ولا إنتوا بتحبوا الفشخرة ، ده مش وقت فشخرة ده وقت بناء لازم نبني مع الريس ، هو معندوش حيلة غيرنا فشغال علينا هو بيتك علينا وخلاص بنفرفر بس ميجراش حاجة دي إرادة ربنا إظاهر إنتوا إرتكبتوا معاصي للركب فربنا بيخلص ، الرجل معندوش ذنب دا هو وشكوا ، إنتوا لو عندكوا إخلاص وشفعات وفتكات كان زمانكوا الكريز مالي التلاجة وبتاكلوا كيزر ولوز وفوز وكوز درة ، بس ربنا بيسلط أبدان علي أبدان ، كنتوا عايشين زي الفل وبتبنوا وبتحوشوا قاعدتوا تقولوا الرجل حرامي وناهب فلوسنا ومجوعنا ، ومسرطنا ، طيب إشربوا ، بس علي رأي المثل ” اللي يحب الدح ميقولش أح “
