من يوم ما وعيت ماسك طبلة
كان كل شوارع الناس عارفاه
خطوة بخطوة
واهو كنا صغار وبنسرح دايما شلة وراه
ونادي معاه على طير مفقود
او دبح جاموسة ف ليلة العيد
عم شهاب
طول عمره فقير
لكن راسماله قلوب الخلق
كان دمه خفيف
وبيعشق كل ولاد الريف
تجاعيده نقوش بتاريخ الدنيا الدوارة
هندامه عجيب
وعمامته اصيلة تشوف منها كرامات الروح
والطبلة معاه
اوتار بتدق وتسحب ودن النداهة
وبتمشي معانا ف ليل رمضان
وتصحي الناس الشقيانة
عم شهاب
بيانوللا وعايشة ف وسطينا
بتطوف وتدور
وتصحي الحلم النايم جنب ضلال البيت
ومصاحبة هلال دايما يطلع ف ميعاد الشهر
واهو يوم ورا يوم يعمل دايرة
قنديل بيحرض عالمواويل وف عشق الليل
عم شهاب
صوته بيسحر في صبايا الغيط
صفصافة بتغمز صفصافة
خجلانة فروعها بتتمايل مع شدو رخيم
مغروسة صفوف عند الترعة والشعر طويل
عم شهاب
فنان من طينة طمي النيل
والدقة بإيده من الأسرار
حافظ حواديت جدي وجدك
وابو زيد وكليب وكتير أحرار
وفي صبح حزين جاي بيبكي ترانيم الموت
وفارقنا وعشنا اليوم كله بنحيب وسكوت
ووداع متحني بغيمة وسدت عين الشمس
اللي غيابها كان ويل وحداد
بقى قبره مزار وترابه عمار
لطفولة وبايتة ف صدر كبار
مصاحبنا بروحه وصوته نهار
بغناوي وعايشة ف ذكرانا
دواوين العمر
