مصطفى السبع
أجمل إبتسامة هى إبتسامة الصباح لأن العقل لسه فى سكون ومشتغلش علشان يفكر فى الخير أوالشر .
علشان كده تلاقى الإبتسامة بدون شعور وأنت مش عارف رايحه لأى إتجاه وده يدل على أن النوم فعلا سلطان بتنام وأول ماتصحى تحس أنك إنسان جديد وفكر جديد وبعد شوية لما بتفوق بتبدأ تفكر فى اللى حصل إمبارح واللى أنت كنت بتخطط له ممكن تكون خططت إنك تأذى حد وممكن تكون فكرت إنك ممكن تعمل خير مع حد .
طيب ماتيجوا نحاول ونعمل كده ننام ونصحى ونفكر فى اليوم الجديد وننسي إمبارح ااااه تنسي إمبارح بجوارحه لكن متنساش حلاوته ومش بقول كده علشان تنسي إن فيه مثلا حد خد منك فلوس سلف تقوم تسمع كلامى وتنساهم لا أنا عاوزك تنسي الشر وتنسي الكذب وتنسي النميمه وتنسي الحرام وتفكر أنك تبدأ بيوم جديد كله أمل وحب ونقاء وتخلى إبتسامتك الجميلة اللى من غير شعور أو لا إرادية تبقى هى المتواصله معاك وزع حبك وخيرك على كل اللى حواليك متعملش زى الناس اللى بخلت على نفسها وعلى أقرب الناس لها وخافوا على فلوسهم وتركوها فى البنوك من غير مايستمتعوا بيها ولما ماتوا فضلت الفلوس مكانها زى ماهى وهو لا إستفاد منها ولا غيره إستفاد منها ومات وهو مقهور على حياته وعاش حياته بدون مايستمتع بيها ويعيش فى خيرها.
برضوا الإبتسامه دى كنز للإنسان لو بخلت بيها على كل اللى حواليك هتندم لأنك أكيد هيجيلك يوم مش هتقدر تبتسم فيه وتتمنى لحظة من اللحظات اللى فاتت عليك وأنت بخلت بيها على نفسك وعلى غيرك .
لا لا يا صديقى لازم تنقى قلبك وتبتسم وتعطى للجميع الأمل فى الحياة وخليها رساله مبعوثه من خلالك للجميع أن الخير والحب هما إسلوب الحياة وإسلوب الحياة لابد أن يكون على قواعد أساسيه ثابته وقوية .
إبتسم إفرح حب الخير لكل الناس علمهم وفكرهم أن الدنيا بخير وأن الحياة جميلة وأن كل عمل جميل فى حياتك هيستمر حتى بعد مماتك .
إفرح لشبابك وأتهنى هتلاقى الدنيا بقت جنة.
