انا المسلم وطول عمرى
اعز اصحابى عاش حنّا
لاعمره قال اذان عالى
ولاانا غلطت ف الرنّه
وكنا ف مشينا نضحك
ياواد مين فيناف الجنه؟؟؟
يقلى يسوع هياخدنى
واقله انا برضه ع السنّه
يقلى لو انت نادينى
واقله ياصاحبى اتمنى
وتعلى الضحكة ويقولو
اكيد هتعلمه (الغنّه)
يقول م انا برضه انجيلى
ف قلب كتابكو استنى
تكونش نسيت بشارتنا
روح اقرى( الصف )واتأنى
ومن كتر الوداد قالوا
مناول روحه ف البنا
اروح له ف نص اكليله
يجينى ف زفة الحنه
ومن يومها للحظتنا
مفيش مخلوق فَصَل بينّا
يقولى ربنا محبه
واقول وصت السنّه
بأهل الذمة نتوصى
وعاش ياسر مع حنا
