حد الزعف – بقلم لطفي علي حسن

يعني ايه مسيحي يدخل كنيسته يتعبد تتحول من دارعباده لغابة

من امتي كان الكره بيدخل جامع اوكنيسه

وازاي ارواح مصريين تكون رخيصه

هيقولو في الاعلام القاتل اصله سني اوحتي اخواني ياشيعة

هيستسهلو ويلبسونا العمة فكرين عقولنا باظت من الفجيعه

القاتل قدام عيونكم بس انتم مغفلين

القاتل اصلة منكم ماتفوقو يامصريين

من يوم ماقلتم انت مسلم وانت مسيحي واتزرعت الفرقه جوانا

سيبتم كلاب من بره تهدم الحب جوانا

دي كلاب جبانه جعانة عايزا تنهش لحمنا وبرضانا

ولوقنبله في جامع يبقي الي حاطتها مسيحي

ولوكنيسه اتفجرت اكيد مسلم وارفع شكوتي لرئيسي

وكل الي يتقال انا جوه بلدي مضطهد واحموني من باقي الملل

يادي العلل ناسي ان اللي موجود واكل معاك من نفس الطبق

ليه تخلي غريب يخدعك وبفرقتك عن اخوك يوجعك

فاكرينها سهله يموت واحد من جوه مصر

مسيحي كان او مسلم قتله بيحصرالقلب حصر

والحزن دخل كل البيوت وعلي ارواح اخوتنا بنصرخ باعلي صوت في امن وامان المصري في بلادة

وازاي نسيب اغراب تزرع جوانا الكئابه

هاتولي بس اجابة ازاي يوم جميل يتحول لحزن وكئابه

ومن امتي بيوت ربنا اتحولت من عباده لغابة