كتب : يوسف محمود
إرسم صورة …
صورة تكون ملامحها جميلة ..
صورة عيلة ..
ارسم كل ما فيها بيضحك ..
إلا الشخص اللي بيتفارق ..
***
إرسم واحد حاضن واحدة ..
وبنت من الأحزان متاخدة ..
إرسم واحد عاش ع الوحدة ..
لدرجة إنه بقي مش فارق ..
***
إرسم ضحكة تكون مقتولة ..
و إرسم سكة لكن مقفولة ..
وإرسم واحد حابب يفرح ..
بس الفرح عليه مش لايق ..
***
إرسم واحد عاش للذكري ..
بس الذكري رافضة تعيشله ..
حابب الماضي وكاره بكرة ..
وطول الوقت حزين متضايق ..
***
ارسم وردة ف حوش مزروعة ..
وإرسم دمعة ومش مسموعة ..
وبنت بقالها سنين موجوعة ..
وبتفكر ف حبيبها السابق ..
***
ارسم واحد نفسه يعيط ..
و جرح بقاله سنين متخيط ..
واحد ب الأحزان متحوّط ..
وارسم عالم كله منافق ..
***
وإكتب فوق الرسمة ” الماضي ”
وإرمي الورقة بكل ما فيها ..
” أي صعاب ف الدنيا تقابلك هتعديها ” ..
ورغم الجرح الساكن دايما جوا ملامحك ..
بكره هتضحك ..
وتلاقي البنت اللي تحبك ..
وتكون أمورة و بغباوة ..
والجرح مسيره هيتداوي ..
كل الموضوع إن عندك ..
يأس من الماضي اللي معاندك ..
بكرة تلاقي الحظ مساندك ..
وهترسم من تاني الصورة ..
صورة تكون ملامحها جميلة ..
صورة عيلة ..
