بقلم احمد رضا
بلياتشو وسيرك وناس عايشه
وحيطان وحيتان ورصاصه طايشه
وجبال م الهم وم الاوجاع
والقلب يحب يقوم متباع
وسكوت وشكوك وافرح بتموت
ودموع بتنوح ف جفون بايشه
انسان ونسان
لكن شتان بين ونس الوحده و ونس الروح
وضلوع بتبوح
اوجاع وجروح
وتهد سروح
وبتبني ف قلعه من الدخان
انا كان يا ما كان
انا مُت زمان
والعايش بينكم طيف مدبوح
ملعون يا ضمير
شغال تدمير
ف خلايا وجودي المتهالكه
وبتبني حدود
وتسد سدود
ف سكك للموت كانت سالكه
انا حد عويل ومنيش فلتة
انا اقصي آمالي “الشاي فتلة”
وهدوء ف الليل
وقلوب بتميل
وإني اعرف انام ..
الوضع مريب
وانا حالف اغيب
مرجعش ف يوم ليكم تاني
انا حد حنين واناني
انا اقوي ضعيف عايش ع الارض
انا بتعب ياما كتير م السرد
هل ينفع نرجع تاني لبعض !!
انا نفسي اكون !
ميكونش رصيدي
من الاشياء اشلاء
انا صِرت هباء
القرب غباء
وانا كل ما اقرب
اكون مجنون ..
انا نفسي اعيش
محبوب .. متصان
مش كل ما احب ابات متخان !
