د/مايسه عبدالحى شعيب
1 – لما تيجى تزود الماية لازم تكون العربية باردة و تبقى لسة مدورها .. يعنى الصبح بدرى و انت نازل الشغل كدة تدور و تفتح تزود الماية .. و بيبقى فية علامتين فى أربة الماية Low & Max تخلى مستوى الماية بين الكلمتين دول
2 – لازم كل شهرين او تلاتة كدة تعمل Check على جميع سوايل العربية و تزود ماية المساحات
3 – كل يوم و انت نازل تلف لفة حوالين العربية و تخبط ب ايدك خبطة كدة على كل رفرف عشان بيبقى فى قطط و كلاب نايمين بين الفردة و الرفرف بدل ما تشيل ذنبهم ..
4 – تخلى ديما رجلك على الدبرياج و الفرامل و انت داخل اى تقاطع ..
5 – لو اوتوماتيك يبقى طول مانت واقف فى اشارة او زحمة تحط الفتيس على ال N
6 – كل اسبوع تراجع ضغط الهوا فى الكاوتش و تخلية على 30
7 – بلاش تعمل غرز بالعربية و تجرى و انت لسة جديد على الطريق
8 – استعمل الاشارات دى حلوة اوى
9 – و حياة اغلى ما عندك تشغل نورك كلة و انت على طريق سريع عشان الناس تشوفك
10 – حط بنزين 92 للعربية
11 – متبقاش الدنيا واقفة و زحمة و انت عمال تضرب كلاكسات كدة كدة الدنيا واقفة الناس مش هتطير ( اتعلم الفن )
12 – لو نازل من شارع جانبى و داخل يمين تبص على الشمال فى العربيات اللى جاية
و نفس الكلام لو نازل شمال تبص على اليمين
13 – فى مرايات لازم تستخدمها دى بتوريك مين وراك و مين جانبك …
14 – بلاش تعدى سرعة 80 و انت لسة مادة خام ..
15 – الدواسة اللى على اليمين دى بنزين .. النص فرامل .. الشمال دبرياج و فى الاوتوماتيك مفيش دبرياج
