مين ده اللي يقدر
يملكني أنا
أوعي تفتكر إني
زي أي حد
ولا عمري أبيع ود
لكني في عز السكينة
بقدر أطير
وابعد كمان
أبعد كتير
أكتر مما تتخيل عينيك
وأبعد ما يحس قلبك
وأكتر من الكون ده كله
أوعي تتخيل
ان قلبي هو ملكك
أوعي تفتكر عشان بحبك
يبقي خلاص ملكني قلبك
صحيح أنا جوه مني
طفلة هادية وحلوة وطيبة
لكن مع أي جرح
أي كدب
أي تهبيل في الكلام
تصحي مارد عمره ما رضخ
ولا عرف الإستسلام
يرفض يكون خاضع ذليل
يرفض حتي السلام
أوعي تفتكر علشان بحبك
ولا علشان أنت كل
حاجه في الحياة
تقدر تغير تمردي
ولا تحولني لأي إتجاه
أنت عارف
أنا زي الريح اللي ساير
وبنفس قوته
مهما قابل من الصعاب
أنا زي الطير اللي هاجر
ورافض رغم شوقه الرجوع
لأنه ما يحب العذاب
أنت عارف
يمكن أنت مش زي أي حد
أنت عارف
يمكن من غيرك أتوه وأضيع
وأسأل وما ألاقي رد
يمكن أكون محتاجه لك
يمكن أكون رغم بعدك
أنا برضو في بالك
لكن عمري ما أنحني
ولا أنادي قلب باعني
ولا قفل في وشي باب
أنا كده
أتولدت متمردة
أهوي الصعاب
أنت عارف أنت
بالنسبه لي أيه
يمكن في يوم تجيلي
وهتلاقيني
لكن مش هكون أنا
مش أنا اللي كانت
راسمة علي ضي القمر
لهفه وشوق وهنا
هتلاقيني واحده تانية متغيرة
باقي فيها من بقايا الحب شئ
باقي فيها دمعة
في عيون متحيرة .
