معايا للبيع إنسان
مين يشتري؟
كان نفسه يكبر لكن
القدر كان عليه
مفتري.
مين يشتري إخلاص
وحب طيب مش حب
وخلاص.
ملفوف بورقة سوليفان
اسمها اهتمام وإخلاص.
بس الأرض
مش أرضه
والعرض هتك عرضه!
صلوات اليوم كلها
مابتأديش له
فرضه!.
مزروع في عمق الطين
رغم نقاءه.
قلبه زي العسل بس
محدش داقه!
عبيط ياللي تهين العسل
لمجرد ان العسل
جوه البلاص!
معايا الإخلاص.
معايا للبيع إنسان
مين يشتري؟ مين
معايا؟
مين هيحقق لي
منايا؟
….
مين هيشتري الإنسان؟
ويترك الظالم المجرم
الجبان؟
معايا بجد إنسان
بينه وبين اللي بتشوفوه
والإنسان اللي تعرفوه
برزخ لا يبغيان!
بحق الله الذي رفع السماء
بلا عمدان.
معايا بجد وبحق وحقيق
إنسان
مين يشتري أخلاق وثقافة
وحضارة عظيمة، مين يشتري
خطفة زمان!
الثمن ماتقلقوش
ماهو لأنه انسان محترم
الفلوس مابتهموش!
الثمن للي معاه
عملة نادرة بسيطة
وهادية
اسمها حقوق الإنسان!
مين يشتري مني
الآمان؟ .
معايا للبيع إنسان.
إنسان كان فوق
العادة.
حابب جراحه بزيادة
قهوة حياته بيشربها
سادة.
مكنش بيحلم ببني
آدمين
كان حلمه بس يقابل
إنسان! .
معايا بجد إنسان مش
بالرطل ولا بالطن ولا
بالكيلو
تعالى ووزن بنفسك
منغير ميزان!
مين راح يشتري مني
الإنسان؟
اول حرف من اسمه
م. محتمل يكون في يوم
سعيد.
تاني حروف اسمه ح.
رافض يقول حاضر لأنه
عنيد
رافض يقول حاضر كما
كما العبيد!
اخر حروف الإسم تلاقيها
ظاهرة على الجسم
دبلان، بيدب بدون رجلين
كمان!
تملي تلاقيه شارد
فارد قلوع إرادته وصامد
شاكر ربه وحامد
بيحب جو العيلة، بيحب
يشيل الشيلة
بيحب يقرا آل عمران
معايا للبيع إنسان
مين يشتري؟ .
