آه يا دنيا.. بقلم. أحمد إبراهيم خليل

آه يا دنيا

الكل بيجرى ويتسابق
ع الدنيا الكل بيتخانق
واقفين لبعض على الواحده
يا خساره قلوبنا بقت جاحده

الكل بيجرى على الفاضى
مفيش يا دنيا واحد راضى
إللى بيقدر مبيعفيش
ودا دلوقتى بقى العادى

الكل طمعان ومفيش
والحِجه إيه أكل العيش
ياريت فى لقمة مكفية
أو عارفين ياناس حتى نعيش

الكل بيجرى على المال
من أى سكه شغال
عشان بعدنا عن الله
وصلنا خلاص لأصعب حال

الكره مالى قلوب الناس
الكل نفسى وبس خلاص
وما دام بعدنا عن الدين
مفيش بشر ولا إحساس

عايشين بنجرى على هوانا
والآخرة مش فارقه معانا
دا العُمر بيعدى ثوانى
كتر الذنوب آه عميانا

كلماتى
أحمد إبراهيم خليل