أنا اللي هتفت يا أمي
وكفني كان علي كُمي
وقلت بروحي أفديكي
واروي الارض من دمي
وانسي غربتي فيكي
ومهما عليت انا بيكي
ما انا منك وانا ليكي
وانا اللي هتفت يا غاليه
وقلت بروحي افديكي
واعد اللحظه والثانيه
ومهما أبعد أناديكي
وأقولك يامه وحشاني
عيونك يامه عنواني
وأجمل حآجه ف عينيه
أشوف الدنيا ورديه
واشوف الصحرا بتغني
ما بين الخضره والميه
وصوت فلاح ف بستانك
بيهتف أحلي أغنيه
ويرسم ع الوجوه بسمه
تعيد الروح بحنيه
واشوف الكون بساط اخضر
وإيد عرقانه وعافيه
بتفتح للقلوب فرحه
وتبني ع السطوح غيه
حمام الحي يتجمع
علي كومه وبنيه
وليه يا اما بنتفرق
بإيد مجنونه وحشيه
وليه يا اما بنتفرق
بدل واحد نكون ميه
ونتجمع علي حبك
هدف واحد وروح واحده
بشرط نجدد النيه
ياريت ياما تضمينا
يا ست الكل يا باهيه
يا لمه اخواتي والعيله
ومين ياامى يشيل همك
ويرفع عنك الشيله
يا أحسن أم ف الدنيا
ولو جربت أغيب عنك
أعد اللحظه والثانيه
أشوفك وسط اخواتي
تشاوري عليه وتنادي
يا أجمل كلمه يا بلادي
يا كلمة حب تجمعنا
علي الصوره وع المعني
وأكتر حاجه توجعنا
نشوف دمعه علي خدودك
وفرحة قلبي ف وجودك
وأشوف اخواتي حواليكي
واشوف الصبح ف عينيكي
بيتمايل من الفرحه
ويرمي ورود علي الطرحه
تشيلي الورد وتلمي
تمدي إيداكي وضمي
حنانك يامى يكفيني
وهمسك يامى يشجيني
يرجعني ومن تاني
يا أجمل كلمه في وداني
يا أجمل كلمه يا أمي
