كتب. د/مايسه عبدالحى شعيب
مش كتير يعرفوا إن ( يحيى الفخرانى ) متجوز ( د / لميس جابر ) ..ومش كتير يعرفوا إن ( د/ لميس ) مسيحية ! .. الأتنين ناجحين .. الأتنين سعداء .. الأتنين لسه بيحبوا بعض .. تقف كتير مستغرب قدام شكل الجواز ده اللى استمر أكتر من 44 سنة بنفس القوة والحب رغم كل الإختلافات اللى بينهم ! .. بمعايير الوسامة الذكورية ( الفخرانى ) يكسب .. التقاطيع المسمسمة ، الشعر الأصفر ، العيون الملونة والبشرة الفاتحة .. وبمعايير الأنوثة ( لميس ) مش هتكون أكتر واحدة مميزة ممكن يقابلها فـ الكلية فـ تشد إنتباهه .. البنت السمراء المثقفة اللى لابسة نضارة كبيرة وشعرها قصير ولبسها غالب عليه الطبع الولادى .. تكتشف مع الوقت إن الموضوع ملوش أى علاقة بالشكل ومش ده كان أساس الإختيار .. هو الحب وبس .. ( الفخرانى ) فـ حواره مع مجلة أخبار النجوم يوليو 2010 قال فـ المانشيت الرئيسى للمجلة ( زوجتى فى عينى أكثر أنوثة من نانسى عجرم ) .. السنة اللى فاتت لما ( لميس ) تعبت ودخلت المستشفى واتحجزت هناك ؛صمم ( الفخرانى ) يبات معاها كـ مرافق .. بيحكى ع قناة CBC عن الموقف ده إنه نام فـ السرير اللى جنبها .. من عادته وهو نايم يرمى الغطا من فوقه .. فاق فـ وسط النوم ولقاها واقفة من سريرها جنب سريره بتعافر وهى تعبانة عشان تغطيه ! .. حتى لما خلفوا طارق وشادى – ( اللى كانوا مسلمين زى والدهم ) – ماتستغربش لما تعرف إن واحد منهم حب وأتجوز بنت خاله – ( المسيحية برضه زى عمتها ) – وكملوا حياتهم اللى شبه قصة يحيى ولميس .. نوع مختلف من العلاقة المتغلفة تسامح ومحبة .. علاقة محددة مـ الأول وكل طرف عارف هو عايز إيه من التانى وهيديله إيه .. مساحتك ومساحتى .. حُبنا .. أولادنا .. أطراف معادلة قوية ماكنتش هتستمر أكتر من 44 سنة جواز لولا إن أصحابها عاقلين كفاية
– فـ النصيب والحب ماتوجعش دماغك أشمعنى فلان أختار فلانة أو العكس .. الحب ملوش علاقة بـ ده بكرش ولا دى شعرها أكرت ولا تُخن ولا رُفع .. حد حب حد فـ تبت فيه للآخر فالأتنين كسبوا .. المكياج بيروح بـ شوية ميه .. والحلاوة بتروح بـ شوية تجاعيد .. وحدها بس اللى بتفضل الدماغ والقلب اللى أختاروا و نقوا
