رنات

بقلم / خالد الترامسي

هو مش موضوع غريب ، دى حاجة كل يوم بنسمعها فيه إللى بيوجع دمغنا وبنبقى عاوزين نرمى صاحب الموبايل مالبص ، أو نحدفه من خامس دور ، أو نرقعه على قفاه ، المهم رنات الموبايل ، بتختلف من شخص إلى أخر حسب ميوله وإتجاهاته الفكرية والعقائدية والسياسية ، وبرضو فيه إللى بيختلف حسب المزاج وهل هو مبسوط ولا مقريف ، حتى سبب الإنبساط أو القريفة بيسيطر برضو على نوع الرنة .

المهم ندخل فى صلب الموضوع كلنا بنركب مترو طيب بص ، طيب إيه رأيكوا فى الميكروباص ، وطبعا عشان السيد السواق ميزعلش فنبدأ بالست أُ،،،،،، ولا بلاش لانلاقى مَنَفِلَة فى دمغنا ولا حاجة المهم الرجل الباشا السواق ، رنته لازم تكون أغنية من الأغانى الهيفة ، أه على أحدث شريط للمطرب الهايف زعبولا عبد الرحمن ، وأي حاجة فى أى حاجة وأهى حاجة تسطل الأنفخى ، بتقولوا إيه ؟ مبقاش فى شرايط بقى فى ” cd ” وفلاشة أه ماشى أعزرونى يا جماعة أنا جاى من كفر مسعدة طاظة .

أما بقى رنة الناس المتدينة فدى بتختلف من متدين لأخر يعنى الناس المتصوفة والبهاليل ورواد سيدنا الحسين فمفيش غير دعاء سيدنا الشيخ الشعراوى ، أما الناس السلفية على طول أدعية الشيخ حسان البركة بتاعتهم والحوينى ، ومصطفى مرزوق ، مين مصطفى مرزوق ده ، أما إذا كان السلفية من الناس إللى راحوا السعودية وعملوا خميرة على طول تلاقى أدعية الشريم والسديس ، أما عن الأخوة المسيحيين بمناسبة الوحدة الوطنية فإما لا تلاقى الرنة ترانيم كنسية أو صوت البابا شنودة أو البابا تواضرس .

ندخل بقى على العنصرية فى الرنات فنلاقى بتوع الصعيد على طول رناتهم الشيخ ياسين ، أما بتوع القناة فتلاقى السمسمية ، أما إحنا الغلابة بتوع وجه بحرى فملناش هوية ، ودى بقى الخباسة بعينها أيوية تربية المنايفة أه ممكن تكون فى بور سعيد ويكون الصعايدة عاملين مشكلة مع البور سعيدية ولا العكس ، هنا بقى المفهومية تشتغل ، وأحسن حاجة أكون أبيض وأمش مع كل لون .

يا خبر منقدرش ننسى الحبيبة لو واحد بيحب جديد أو واحدة برضو بتحب موز جديد ، أكيد طبعا هنلاقى أغنية عاطفية ، وأكيد ممكن تكون ” أهواك ” ، أما لو فسخت الخطوبة أو إطلقت ، فعلى طول يتحول ” عبد الحليم حافظ ” ٣٦٠ درجة فالرنة تكون ” جبار ” وبمناسبة الحب والكره على إعتبار إننا ما زلنا فيها الناس بقى إللى بتحب الجيش حامى الحمى ، ولا نبقى زى سوريا وخالتى فرنسا وطانط وزة أه على طول الرنة تكون ” تسلم الأيادى ” وأظن إنتوا عارفين الباقى ، أما بقى الإخوة البعدا فأكيد ليهم رنة خاصة بيهم بس والله عشان مفتيش أنا معرفهاش بس أكيد حاجات كدة زى الولولة على رابعة ، ولا الولولة على الأخ اللاسع الأهبل إللى إضحك عليه وعملوه ،،،،،،، لا عملوه رئيس ، أنا مش عارف إيه سوء النية دى .

شفتوا إنتوا بتعملوا رناتكوا إزاى ، يعنى الرنات مش بتشطح لوحدها دى وليدة تفكير وعواطف وشفخات وبتكات ، أه مش بتطلع لوحدها كدة ، دى حوارات وأفلام ويمكن إستراتجيات ، وإستراتيجية قصد ٱستراتيجية تانية والشاطر إللى يغلب ، أه الشاطر إللى يغلب .