كتبت د/مايسه عبدالحى شعيب
على ربه المنزل ان نضع في الفريزر كيلو لحمة_عصاج (لحمة مفرومة مستويه)
هيساعدها في اي زنقة عزومة او طبخه سريعه.. حطي كبشه منها على حلة بسلة، حله كوسة، حلة فاصوليا.. ممكن تبقى وجبه لوحدها مع حلة رز وسلاطة وشوربه وبطاطس محمره.. وبتبقى موفرة جداً..
-تخديعة_المحشي .. هاتي 3كيلو طماطم مع كيلو بصل واضربيهم في
الخلاط.. وحطيهم على النار يتصلصلوا.. واول ما يتصلصلوا انزلي عليهم ببرطمان صلصه.. حطي بهاراتك وملحك وفلفل وزيتك بكمية تكفي حجم الطماطم.. وسيبيها تبرد.. قطعي عليها الخضرة زي ما تحبي.. مع الزعتر .. وشيلها في اكياس في الفريزر..
حمري بصلاية في شوية زيت مع توماية وتطلعي الكيس من دول على شووية رز مغسول .. بقى عندك خلطة محشي والبصل هيخليها فريش..
تبقي خايبة قوي لو بتجيبي البقسماط_
هاتي ب3جنيه عيش فينو ، شقيهم بالطول وحمصيهم في الفرن 5 ق وبعدين سيبيهم ينشفوا بره يوم (او حطيهم في الميكوريوف 5 ق) واطحنيهم وحطي نصهم دقيق.. واقولك سر تتبيله ولا فيجيتار: حطي زعتر ، توم بودر،بصل بودر، كسبرة، ملح وفلفل ، جنزبيل بودرة حسب مزاجك.. وبقى عندك احسن بقسماط
هاتيليك كيلو_بانيه أو اكتر.. وتبيله بشوية بهارات وملح وفلفل وبصل
ساعتين، وبعدين حطيه في البقسماط والبيض بتاعك واضربي عليه بايدك ورصيه في طبق بلاستيك او صينية، وبين الطبقات حطي كيس نايلون ، وشيليه في الفريزر.. يطلع من الفرزير على التحمير علطول، لا هيوقع بقسماط ولا هيتعبك..
اعملي صينيتين_جلاش وقطعيهم وشيلي على عددكم في اكياس
بحيث تعملي لكل واحد 2-3 قطع حسب حجم الخارطه، اول ما تعمليه شيليه عشان يبقى فريش.. وطلعيه في الايام اللي حاسه فيها ان سفرتك ناقصها حاجه، تسخنيه في الميكرويف..او في طاسه تيفال على نار هاديه.. او تولعي فرن بوتجازك واول ما يسخن قوي حطي الجلاش فيه واقفلي النار واقفلي الفرن عليه..
اعملي صلصة_جاهزة .. هاتي الطماطم واضربيها في الخلاط وحطيها
على النار مع شوية زيت وبهارتك لحد ما تصلصل.. وممكن تحطي عليها برطمان صلصه.. اول ما تصلصل.. سيبها لما تهدا وشيليها في اكياس تلاجها املي نص الكيس وبططيه وشيليها في الفريرز بحيث تكون عامله زي الملوخيه المجمده ، بتبقى سهله في كسرها وتحطي على الاكل على قد ما تحتاجي..
اعملي دريسنج_السلاطة .. هاتي ازاة بيبسي بلاستيك صغيره..
حطي فيها معلقة ملح ومعلقة كمون وربع فلفل اسود ونص معلقة زعتر ونص كسبره وامليها تلات اربعها خل والباقي زيت وشيليها في التلاجه.. وكل ما تعملي سلاطه ولا تقطعي طماطمايه رجي الازازه دي ورشي منها رشه على السلاطة.. يا سلام لو زيت زيتون.. ويا سلام لو تحطي فص توم مدقوق
. شيلي فراخك_متبلة .. اول ما تجيبي فراخك وتنضفيها.. تبليها ببهاراتك
وشويه خل وشيليها متبله في الفريزر.. هتسهل عليكي كتير.. لو هتشويها اول ما تطلعيها رشي عليها لمون واضربي بصلايه مع طماطمايه ودخليها الفرن مع شوية ميه صغيرين وغطيها بورق الفويل ع درجه حرارة متوسطة وسيبيها تاخود وتجى مع نفسها بالصوص اللي هينزل منها ولما تستوى شيلي ورقه الفويل وسيبيها تحت الشواية شوية تاخود لون وتتحمر وهتبقي طريه وجميله ولو كنتي هتسلقي الفراخ تبقي تشليها في الفريزر من غير تتبيله وتسلقها عادى بتوابل الشوربة الخاصه بيكي بس هتبقي عندك مغسولة وجاهزة للسلق مباشرة
طاسه_تيفال سليمه ممكن تحل محل الميكرويف في التسخين..
حطي اكلك فيها وعلى نار هاديه وغطيها 5-8 ق هيكون الاكل سخن وكون الطاسه تيفال هتخلي الاكل ميلزقش وبنفس رصته في الطاسه ينزل في الطبق.. وخليها طاسه مش حله عشان تعرفي تزحلقي منها الاكل..
-.لما تجيبي كيلو_اللحمة اسلقيه كله، واول ما يستوي شويه.. شيلي
اللحمه من الشوربه وسيبي الشوربه على النار لحد ما تنقص وتبقى مركزه اطفي عليها وسيبيها تبرد.. قسمي اللحمه على عدد الطبخات ومعاها كوبايتين من الشوربه المركز وشيليها في عليه او في كيس في الفريزر، لما تحبي تطبخيها مع_خضار .. تطلعيها مع كوبايتين مايه وبعد ما تغلي غلوتين سقطي عليها الخضار بتاعك والصلصه .. مش هتاخد منك على النار اكتر من وقت تسوية الرز.. خلال نص ساعة هتكون جاهزه مع الخضار..
– لو بتعرفي تعملي ممبار .. احشيه واسلقيه وشيليه مسلوق في الفريزر
..ويوم ما تحبي تستخدميه سيبيه يفك واغلي مايه فيها معلقة صلصه وشويه ملح وفلفل وسقطيه فيها دقيقه وطلعيه حمريه.. هيكون زي الفريش..
..بطاطس
محمرة.. بطاطس محشية لحمة مفرومة.. جلاش محشي لحمة مفرومة.. قوارب الكوسة.. سلطة فاصوليا.. سلطة باباغنوج.. كل دول حاجات بتساعدك جنب السفره خصوصا لو عامله منهم كميات قليله..
– شيلي خضارك متنضف ومتقطع على الطبخ، وشيلي خضار سلاطتك
متنضف..
شيلي السلق بتاعك متحمر ومضروب في الخلاط في اكياس..
كفتة_الرز تحمريها وتتقسم في اكياس على قد الاكل وتشليها في
الفريزر وتطلع على الصلصه على طول ..
وكفتة_اللحمة حطي عليها توابلها مع البصل واعمليها صوابع وشيلها
في اطباق فويل فالفريزر
وحطيها بطبقها في الفرن .. او ممكن تكوريها وتحطيها في الفريزر،ولما تطلعيها سويها في صلصة وتبقى داود_باشا ..
– كل ده هيساعدك لو عزومة فجأة او لما النور يقطع في اوقات حرجه..
