كتب رضا بدير
جريدة الشاهد المصري
طيب ما تنضف إنت الأول.. أيوه إنت مستغرب ليه؟
ما إنت بتمارس الفساد كل يوم زيك زى موظف المحليات ويمكن أكتر شوية.. إنتوا الإتنين من الشعب.. الفرق الوحيد بينكم إن كل واحد بيمارس الفساد فى مكان وبطريقة مختلفة.. وأوعى تكون فاكر إن الفساد لما تمارسه خارج مؤسسات الدولة بيبقى ليه إسم تانى زى ما بتحاول دايماً تبرر لنفسك على الأقل.
بتحاول تسميه أكل عيش أو لزوم الشغل أو غصب عنى أو هو ده السوق أو كلنا فى نفس الدايرة أو لو معملتش كده مش هشتغل أو الضرورات تبيح المحظورات… إلخ.
برضو مش عاجبك الكلام أو بتحاول تقنع نفسك إنك مش منهم.. ولا إنت مصمم تكمل فى سكة الحرام؟
أيوه أمال إنت فاكر الفساد ده إيه؟ ما هو حرام بتاكله وبتأكله لولادك وأهل بيتك.. وطبعاً مبتاخدش بالك أو بتعمل نفسك مش واخد بالك من المشاكل والأزمات اللى إنت وبيتك فيها معظم الوقت.. ممكن تكون الأزمات ليها أشكال كتيرة زي حادثة عربية، مرض، خلافات عائلية، ملل وزهق وحاجات تانية كتير، خاصة لو بتتكرر بإستمرار.
هتقولى ما الدولة السبب وهى دايرة وسلسلة لو إتحلت من فوق كل حاجة هتتظبط.. أنا معاك إن الفساد لازم نبتدى نعالجه من فوق وبقوة.. علشان الشعوب بطبعها بتحب الفساد والفوضى.. وهم هم نفسهم اللى بينادوا بمحاربة الفساد، يعنى إتنين فى واحد.
يعنى على سبيل المثال وليس الحصر:
* أي مصنع من مصانع الوجبات السريعة بيغش فى مكونات منتجاته.. فساد
* أى شخص بيبيع عربية مستعملة وتكون عاملة حادثة قبل كدة ويحلف للمشترى إنها فابريكة.. فساد
* أى تاجر بيبيع سلعة يكون منشأها غير اللى مكتوب عليها، أو هو نفسه شارك فى غش السلعة نفسها، أو بيروجلها بأى طريقة.. فساد
* موظف السياحة اللى شايف إنه لازم يعمل مصلحة على السائح ويقلبه فى تغيير عملة أو بيع رحلة أو سلعة بسعر خيالى، أو يطلب منه موبايل أو لاب توب بقلة ذوق أو فلوس علشان عملية أمه الوهمية.. فساد
* الصنايعى اللى مبيعملش شغله بضمير وبيغش فى المون ويطلع عين الزبون علشان يسلمه الشغل.. فساد
* سواق التاكسى اللى بيلعب فى العداد أو بيتخانق مع الزبون علشان ياخد أكتر من حقه.. فساد
* المحامى اللى بيقبل قضية عارف ومتأكد إن العميل فيها المفروض يبقى مدان وهو بيحاول يبرأه.. فساد
* شاهد الزور اللى بيروح يشهد على حاجة مشفهاش علشان يجامل صحبه أو قريبه.. فساد
*الدكتور اللى بيتاجر بالمرضى وواخد الموضوع تجارة بدل ما تكون رسالة.. فساد
*المهندس أو المقاول اللى بيبيع ضميره ويغش فى نسب مكونات البنا علشان يسمسر.. فساد
*المحاسب القانونى اللى بيزور تقارير لعملائه علشان الضرايب وغيره.. فساد
*المبالغة والمغالاة فى نسب الأرباح بدافع الطمع والرغبة فى الثراء الفاحش.. فساد
*الإعلامى أو الصحفى اللى بيبيع ضميره وشرفه المهنى للى يدفع أكتر مهما كان الثمن اللى بيقدمه.. فساد
على فكرة.. الأمثلة اللى فاتت دى لا هى شغالة فى المحليات ولا فى مؤسسات الدولة!
كل الحكاية إنهم عندهم مبرراتهم، ومستنيين الدولة تقومهم وتمنعهم من ممارسة الفساد، علشان هم مش قادرين يمنعوا نفسهم.. هم قادرين بس يتكلموا عن فساد غيرهم! غيرهم اللى هم منهم، ومنهم هم !!
حاول تشوف كده إنت مين فى الأمثلة اللى فاتت دى، ولو ملقتش مهنتك أو وظيفتك مكتوبة، إبقى إكتبها بنفسك، علشان لسه القايمة طويلة!
كان هذا حوار خاص مع الاستاذ / محمد الفحام امين حزب في حب مصر بالاسماعلية
