محمود بيومي
قول يا سامح قول يا تامر
إيه بيحصل في السناتر
انت يابني جاي تشيش
ولا جاي علشان تذاكر
أصلي شايف دخنة والعه
جاية من شباك في سنتر
شامم الريحة اللي طالعه
وصوت حجر عمال يكركر
قولت يا زغلول حلاوتك
قالي مَش زغلول وبس
الحجارة كتير يا باشا
في كمان تفاح وقص
قلت تيجي ازاي يا عالم
قالي قشطة وكله عادي
اضرب الأنفاس وركز
لجل ما تعدي السنادي
الشبه بين الدراسة
والشيش علمي وأكيد
قلب شيشة ومخ طالب
لازم الاتنين حديد
واللي مَش فاهم وناسي
والغبي اللي دماغه فاضية
بص ركز تلقى راسه
زي فارغة شيشة نادية
والعلام مكتوب يا باشا
في الكتب كراس مكرس
برضو نفس اللفظ هو
رص شيشة يعني كرّس
والحجارة هي هي
ده حجر شيشة تشده
والإساس في العلم برضو
له حجر إياك تهده
واد معسل يعني ناجح
فهلوي ودماغه سالكه
والغبي زي القوالح
فحم مطفي وناره سكّة
شد حيلك في الدراسة
شد صدرك شد جوزه
كل شد عاوزله صحة
او هتسقط في الكازوزة
خد مزاجك عيش براحتك
بعد ما تروّق يا بيه
تلقى مستر جاي يحاسبك
قولي يابني شربت ايه
