الإضراب عن العمل بعد الإعتداء على أحد أطباء مستشفى معهد ناصر بالضرب تحت سمع وبصر أمن المستشفى

متابعة عبد التواب مسلم

قام أحد أهالى المرضى داخل طوارىء مستشفى معهد ناصر بالإعتداء على الدكتور “أيمن ” أحد نواب طوارئ “معهد ناصر” وإصابته إصابة بالغه تحت سمع وبصر أمن المستشفى مما دفع النواب للأضراب عن العمل لحين عودة حقوقهم،

حيث يحاول مدير المعهد الضغط عليهم لممارسة العمل حتى لا يتوقف مما دفع الطبيب المصاب لنشر ما حدث معه على مواقع التواصل الاجتماعي لتدخل المسئولين وعودة حقه خاصة أنه محجوز فى إحدى الغرف بكسر سنته وإحدى أصابعه وإليكم ما حدث على لسان الطبيب

(انا  السيد ايمن نايب طوارئ ف معهد ناصر…

يوم الجمعة 21/7  دخل عيان ….  العيان دخل د.  محمد ابراهيم السينور بتاعي كشف عليه..  وطلبله اشعه عادية ع البطن و سونار  وتحليل شاملة … العيان عمل اشعاته طلعت كويسة..  طلب من التمريض اللي معانا انها تعمله  رسم قلب (كان معانا تمريض واحد بس في الشيفت)  التمريض كان معاها عيان تاني قالتله حاضر هخلص العيان اللي معايا بس..

جه واحد من ابناء العيان وزعق للتمريض وشتمها..  د.  محمد ابراهيم  بيقوله متزعقش للتمريض و واحد بس يستني مع العيان  شتم د كتور محمد و ضربه ف وشه   رحنا نكلمه انا و د. محمد النبوي  فجاءة لاقينا ولاد العيان التلاته  الرجاله  نزلوا فينا ضرب لدرجة ان ابراهيم اتسحل ف وسطهم وانا فوجئت بنته و مراته واحدة ماسكة الكرسي والتانية ماسكة حامل المحاليل ونزلوا ضرب ف واحد من التمريض اسمه محمد رشاد وانا سنتي اتكسرت ومحتاجة زرع سنة جديدة ب 12الف ج و عندي كسر ف صباعي السبابة ..

كل ده  والامن بيتفرج علينا..

دخلنا الاوضه بتاعنا و اتقفنا اننا هنمشي خرجت من باب الكورنيش اقابل باقي الناس لقيت العيال مستنين قدام الباب لولا ان الظابط مسكهم وجابهم ع النقطة اتضح ان الامن الي هنا سربهم واخد فلوس..

جه نايب المدير يقولنا اشتغلوا  ومعلش ..

انا حاليا محجوز ف اوضه 736 جراحة مخ واعصاب و عندي كسر ف سنتي و كسر ف صباع ايدي اليمن  وارتجاح ف المخ

واحنا كنواب طواري معهد ناصر مش شغالين الا لما حقنا يرجع علشان منبقاش ملطشة .. ومدير المعهد عاوزنا نشتغل ونمشي الحالات….

انا مشتغلش دكتور علشان كرامتي تتهان.

انا مش عاوز حاجة غير حقي..  وده مش كتير)