وضع وزير التعليم كل الضوابط التى تخص امتحانات الثانوية العامة وذلك قبل انطلاق يومها الأول
* التبكير للجنة قبل التاسعة /
– عايز تاخد ورقة الإجابة بدري قبل الساعة ٩ وتكتب بياناتك وتسجل رقم الجلوس وتراجع بياناتك قبل الامتحان.. يبقى تروح اللجنة بدري وتتفتش بدري وتدخل لجنتك بدري.
* احذر الغش أو الشغب باللجنة /
–جميع لجان الثانوية العامة مزودة بكاميرات مراقبة. والكاميرات متصلة بغرفة عمليات.. ونقدر نشوف أي حركة داخل اللجنة.. هنجيبك يعني هنجيبك لو عملت حاجة غلط. الطالب وهو داخل من باب المدرسة هيتفتش حتى لو وصل متأخر ومش هيدخل غير لما يتفتش.. لكن بعد بدء الامتحان هندخل اللجنة ونمرر العصا الإلكترونية على الطلبة وهم بيمتحنوا بشكل هادئ.. لو الجهاز عمل صوت يبقى معاك أداة غش وستتمسك ويتعمل لك محضر وهتسقط.. ده مش تفتيش.. ده مرور عادي وانت بتحل الامتحان وطالما مش معاك حاجة يبقى تخاف ليه؟ ، متحاولش تغش من اللي قدامك أو اللي وراك علشان ترتيب الأسئلة مختلف. وخذ بالك انت كل حركة بتعملها في اللجنة متشافة بالكاميرات.. ركز في ورقتك وبس.
* التسريب قبل التاسعة مستحيل وبعد التاسعة سيضبط /
تسريب امتحانات الثانوية العامة مستحيل قبل الساعة ٩ الصبح وأي ورقة تظهر قبل الساعة ٩ تجاهلها واتعامل إنها مزيفة ١٠٠٪.. لكن اللي هيصوّر وينشر أسئلة هنجيبه بعد خمس دقايق وهنعرف مكانه فين بالظبط. وهيسقط سنتين ورا بعض.
* ليس لزاما توحيد لون البوكليت كل يوم والأسئلة
70% بدون صعوبة
– اختلاف لون بوكليت الأسئلة بتاع الثانوية العامة عادي.. وعادي جدا كل يوم تاخد لون بوكليت شكل علشان محدش يقول هو اللون بيختلف ليه ولا انا واحد بوكليت غلط. = ٧٠٪ من الأسئلة بدون صعوبة لكن ٣٠٪ هتيجي لأصحاب مستويات التفكير العليا (صعبة شوية). = أي إجابة في ورقة الأسئلة مش هنصححها ولا الطالب هياخد عليها درجة واحدة.. بيني وبين الطالب ورقة الاجابة فقط (البابل شيت )
* يمكن تعديل الإجابة /
– الإجابة والتظليل بالقلم الجاف فقط مش الرصاص. = أي ورقة فيها علامة (إكس) على إجابة سؤال معين بنصححها بطريقة مختلفة.. وكل اللي بيتقال إن علامة الإكس بتلغي الدرجة غير صحيح تماما. ولو شاكك في درجتك تعالى تظلم وضحك ورقتك لنفسك علشان تتأكد أن صححت لك الإكس ولا لأ
* تعليمات لطلاب اللغات حول الاسئلة المقالية
من حق طالب اللغات في الثانوية العامة، يجاوب على الأسئلة المقالية باللغة العربية أو الإنجليزية، اللي يريحه. الفرق الوحيد بين بابل شيت طالب المدرسة العربي وبابل شيت طالب المدرسة اللغات، إن ترتيب الإجابة لطالب المدرسة العربي (أ- ب- ج-د) وطالب المدرسة اللغات هيلاقيها a-b-c-d. = قللنا عدد أسئلة مادة الإحصاء إلى ١٧ سؤال فقط عليهم ٢٥ درجة.. لكن جميع أسئلة المواد غير المضافة للمجموع اختيار من متعدد وكل سؤال درجة واحدة فقط
*بالنسبة للاسئلة المقالية /
تصحيح الأسئلة المقالية هيكون من خلال اتنين مصححين لكل سؤال.. لو الاتنين قالوا الطالب يستحق على السؤال الدرجة كذا يبقى دي درجة الطالب في السؤال.. لكن لو اختلفوا في تقدير إجابة الطالب بما يزيد على نص درجة (يعني واحد قال درجة وواحد قال نص درجة).. هنستعين بمصحح تالت يصحح لنفس السؤال علشان الطالب ياخد حقه، وهياخد الدرجة الأعلى
*التعود على كتيبات المفاهيم هى نفسها من العام الماضى /
كتيبات المفاهيم بتاعت السنة اللي فاتت هي هي اللي هتتوزع على الطلبة السنادي في اللجان.. ودي موجودة على موقع الوزارة ادخلوا شوفوها علشان تتعودوا عليها.
* لا يوجد كتيبات مفاهيم للمواد غير المضافة ماعدا الاحصاء/
المواد غير المضافة للمجموع ملهاش كتيبات مفاهيم ماعدا مادة الإحصاء هيكون فيها قوانين ونظريات موجودة في نفس بوكليت الأسئلة بتاع الامتحان
