كتب /على محمد على
ذهبت ولية امر الى المدرسة لكى تسال عن سبب فصل ابنها ولكن حصلت ماساه حقيقية لمجرد انها نطقت اسمه..التقت الشاهد بولية الامر وروت لنا ماحدث وبداءت حديثها قائلة..
تجربتي الصادمة معأسوأ مكان ممكن تدخله فحياتك واللي يبان من الخارج بأنه مؤسسة تعليمية تربوية وهو في الحقيقة وكر يجمع اشر خلق الله
يوم الاربعاء الموافق 23/11/2017 رجع ابني الصغير البالغ من العمر 9 سنوات من المدرسة وفي ايده جواب استدعاء ولي الامر وحرمانه من رحلة لهم
سألته ايه اللي حصل عشان تتمنع من الرحلة قاللي المشرفين طلعوا اخدوني من الفصل انا واربع ولاد تاني عشان في ولد تاني بيقول اننا شتمناه وضربناه فالفسحة . وانتو فعلا ضربوته وليه يابني تضربوا زميلكوا.رد ياماما هو قاعد فآخر الفصل جنب الولاد البولدة والميس نقلته جنبي انا وصاحبي واحنا مش عارفين نكتب ومزنوقين والولاد صحابه بأوا يسلطوناا ويقولولنا نخوفه ونقوله احنا هانضربك ونقلعك هدومك .سألته وانتو عملتوا كده فعلا قاللي اه شتمناه وقولناله هانضربك لكن هو لما نزل الفسحة والولاد دول اتخانقوا معاه وضربوه وقال اودام المستر ان انا ماكنتش معاهم انا شتمته بس.ده كلام ابني
اتجهت للمدرسة يوم الاحد 26/11/2017 بناء علي الجواب ودخلت وجلست فانتظار المسئول ودخل شخص يدعي (محمدنبيل) علي انه مدير ابتدائي،سألته خير يافندم ايه الموضوع .فكان اول حاجة قالها لي :طبعا انتي جاية لتبرئة ابنك .ابنك معترف يامدام رديت تبرئته من ايه حضرتك ومعترف بإيه ؟ ابنك يامدام قام بفعل فاضح هو وزمايله واحنا دورنا تقويم السلوك والحفاظ علي المدرسة من اي شئ مشين .(.طبعا هو بيقول الكلام ده وهو بيزعق وصوته جايب اخر المدرسة ) .قلتله فعل ايه اللي يعملوه اطفال فالسن ده وانتو كنتوا فين والفعل ده تم امتي وازاي فالحوش ولا الفصل وفين المشرفين وفين المدرسين وفين كاميراتكوا اللي مالية المدرسة .وريني ايه الفعل ده وهات الولد اللي بتقوله انهم اعتدوا عليه اسأله امامى. رد قالي لا مش هانوري حد حاجة احنا اتأكدنا بنفسنا وهاتك يازعيق والتهجم عليه بالالفاظ ( انتي ست مش محترمة ، انتي حاطة رجلك فوشي وانا باتكلم انتي وانتي ) قلتله انا مش هاتكلم معاك بالأسلوب ده فين مدير المدرسة .انا هنا المدير ووريني هاتعملي ايه كل ده وهو بيزعق ويصرخ بكل وقاحة وابنك مش هايقعد فالمدرسة اذا كان عاجبك واعلي مابخيلك اركبيه فجأة كده ورا بعض ورا بعض لما وقفت مصدومة ولساني اتلجم ، لحد ماحضر استاذ تاني (اسامة) مدرس ثانوي وقالي تعالي معايا حضرتك.دلوقتي الادارة قررت فصل الولاد دول لأنهم معترفين ( حسسوني انهم متحرشين عندهم 17 ولا 19 سنة) قلتله ليه كل ده وايه معترفين دي اللي ماسكين فيها لو في حاجة حصلت وروهاني انتو مش بتقولوا اتأكدوا وفي كاميرات ارجوك وريني انا عاوزة اتأكد زيكو .لا حضرتك احنا مش هنجازف بسمعة المدرسةولو عاوزة تسحبي الملف اسحبيه، اخدت بعضي ومشيت وقلت مش هاكمل مع الشخصين دول لأن شكلهم في شئ فالمدرسة بيتعمدوا اخفائه .لما انتو متأكدين من حدوث فعل فاضح لايغتفر ليه مااطلعش عليه واشوف ابني عمل ايه؟وقررت اني هاروح مباشرة تاني يوم وادخل للمديرة نفسها واطلب منها توضحلي ايه اللي حصل .ماهو مش طبيعي يقعدوا 5 ولاد متفوقين فالبيت لأن هما بس اللي شافوا حاجة ومش من حق اولياء الأمور يشوفوها.اتجهت صباحا للمدرسة . طبعا اول ماشافوني طقم السكرتارية بلغوا المدرسين السابقين اني وصلت اودام غرفة المديرة . دخلت للمديرة .اول مادخلت وهبدأ فالكلام راحت المديرة المحترمة الفاضلة اللي ملقبة نفسها ( بالحاجة) قيلالي ازاي تتهجمي عالمدرسة بالشكل ده رديت فين حضرتك التهجم انا طلبت اني اقابلك والسكرتيرة قالتلي انك فالطابور وجاية وانا داخلة اعرف ايه اللي حصل .انتي عرفتي اللي حصل امبارح وده قرار الادارة خلاص. قلتلها انهي ادارة وادارة ايه اللي تعاقب ولاد اطفال بالقعاد فالبيت لحد الامتحانات ،انا مدخلاه مدرسة ودفعاله فلوس عشان يجي عالامتحانات ! لاقيت دي عبارة عن غولة في صورة انسان قامت تصرخ فوشي اطلعي بره مالكيش ورق عندي ولامستندات امشي من هنا روحي الادارة اشتكي واوسع مامعاكي هاتيه. قلتلها انا مش هاروح ادارة الا مااخد جواب رسمي منك .مافيش جواب باقولك وقومي اطلعي بره.قولتلها يعني ايه اطلع بره انا.انا مدخلاه بورق رسمي يطلع من عندك بورق رسمي مش طابونة هي و لو في حاجة حصلت وروني واعرف ايه اللي اتعرضله ابني او زمايله وانا مش هامشي الا بحضور الشرطة، بس انا قلت هاطلب الشرطة وزي مايكون قرصتهم عقربة كلهم وراحت قايمة ماسكة دباسة عالمكتب وخبطاني علي راسي وقام المدرس المحترم مربي الاجيال ماسكني من رقبتي من ورا ويزوقني من عالكرسي ويشد الطرحة وقامت دخلت 4 مشرفات عبارة عن شوية راحو ساحبني عالارض وسحلوني ولا
كأني اي حرامي ولا بلطجي مسكوه فمصيبة وعاوزين ياخدوا الموبايل اللي هددتهم اني هاطلب منه الشرطة .طبعا انا كل ده وانا فحالة ذهول ووصلت للحظة اني فقدت الوعي ومش مصدقة ان ده بيحصل معايا وفين في قلب مدرسة ومن مين من مديرة وطقم مدرسين ومشرفين مش خناقة فالشارع ولا شوية بلطجية. حسيت اني فوسط عصابة الكاتعة ورجالتها والمكان ده خرابة بيمارسوا فيها شغلهم مش مدرسة ابدا
انضربت واتسحلت وفقدت الوعي للحظات لمجرد اني رحت اسأل ابني بتفصلوه ليه
انضربت واتسحلت وكانوا هايلقعوني هدومي لمجرد اني سألت فين
المدرس اللي شاف الواقعة وعازوة اشوف الكاميرات اللي سجلت اللي حصل ويعني ايه اصل الولاد معترفين واضمن منين انكو فصلتوا السيئين ومحتفظين بالكويسين اللي ماعملوش حاجة
اتضربت واتسحلت وكانوا هايسرقو شنطنتي بالموبايل لمجرد اني قلتلهم اطلبولي الشرطة او انا اللي هاطلبها
اتضربت واتسحلت واتهانت ادام ابني المتفوق اللي بيطلع من الاوائل عشان قلتلهم ادوني قرار رسمي بالفصل ومرفق بي الاسباب وقولوا ان ابني ابو 9 سنين عمل فعل مشين يستحق انه ينطرد مش تقولولي قعديه فالبيت وتعالي عالامتحانات
ادي مدرسة مسمينها ام المؤمنين الخاصة اللي مزينين اسوارها بآيات من القرآن الكريم والاحاديث لزوم السبوبة والضحك علي الناس وهي من جوة بتجمع كفار بل اضل سبيلا..حقا انها مدرسة ام المؤمنين
