عمر ما كان المهم
مكان
لكن المهم هو
الكيان
والكيان محتاج أركان
وكل ركن محتاج
راكان!
ركان يشد عودو
وف السؤال يعرف
ردوده
والردود محتاجة
حكمة !
والحكمة عايزة
إنسان!
بس فين يكون
الإنسان؟
وازاي نشيًد الكيان!
لما كل ركن مركون
لوحده بعيد
وكل بُعد عمال بزيادة
يزيد.
يبقى ازاي هنَبني
الأركان
انا مش جاي الدنيا أحزن
انا عندي حل أحسن
اكسر الأحزان.
وسعولي المكان
انا جاي ابني كيان
نموذج مصغر من ابويا
ورمز لتقوى امي
نبع حنان.
كنت عجينة بتتشكل
ومراحل بناء وهيكل
تطور خلق من بعد
خلق
لحد ما خرجت للدنيا
لاجل ما اعيش وسط
الخلق!
الحياة عبارة عن
مجموعة اركان
كل ركن بيبني في
ذاته كيان.
وكل كيان محتاج لطاقه
محتاج راكان!
من دونه تتهد باقي الأركان!
الكيان لازم له تعاون بين
الأركان
لاجل ماتتجمع وتصبح
كيان!
مدوا أيديكم ليا وخدوا
بكفي الصغير
عدوني بحور الحياة
لاجل ما اكبر وأفكر
وماتنسوش
صحيح انا لسه صغير
لكني جزء مصغر
من إنسان!
لساني تحت اللفة
والدنيا ملفوفة ولفة
ومن لفة وبين لفة
تضيع احلامنا ف
اللفة
ياعيني عليكوا ياناس
ياكبار
ملفوفين حتة للفة!
مغمضين عيونكم
لاحسن تدوخوا من
اللفة!
شيلوا الغمامة وفكروا
نوروا بصيرتكوا وقرروا
واللهِ اكيد راح تقدروا
بشرط لاجل ما تقدروا
على حقايقكم اظهروا!
ماتستنوش كشافات
نوروا ضمايركم واعتبروا،
من كل واحد مات!
انسوا ببكرة كل شيء
فات.
ماتخلوش صراخكم يكون
كما السكات.
خدوا النصيحة من مهدوي
جاي طازة للدنيا بس عارفها
قوي!
…..
اسمحولي اتكلم عن نفسي
شوية.
اول حاجة عرفتها لما
جيت للدنيا دية!
عرفت ان ابوية فيلسوف
فقير!
وده شيء انا مخترتوش
بس الحمد
كدة أحسن كتير.
ان ابويا يكون شريف نظيف
بس واحد م الغلابة
احسن عندي من انه يكون
ديب من الديابة.
الفقر مش عيب ارفع راسك
فوق.
ورغم فقرك يكفيني فكرك
انا يابا مؤمن بك
وفاكر فكرك حابب
عقلك!
ووعد مني طول عمري
هعيش فخور بإنك والدي
هي دنيا الحياة اصلآ ايه؟
ايام بتتعاش
وحياة متفاتا
فمفيش داعي لتلاقيح
الجتت والغتاتة!
الدنيا مش عايزة كُتر
كلام
الدنيا عايزة احترام.
الدنيا مش واحدة ست
للتاتة!
عيشوها منغير ما تغشكم
ولا تغشوها.
واللهِ احسن لكم
تراعوها وتصونوها
عيشوها وفكروا
ازاي هتعرفوا، على
الطاعة تتركوها.
ساعتها بس هتقدروا
والسعادة هتعرفوها!
ولا الوجود عليكم راخر
هان؟
ولسه الكلام على لسان
راكان!
…….
أمي ست جميلة لمجرد
انها امي
وهو ده معنى الإنتماء
اني احبها اعيش تحت
رجلها.
أدعي لدعاء بأجمل دعاء!
أمي.
عيشت جواها جريت جواها
بتجري ف دمي،
انا مش متلوين بلون
البني آدم بويا
انا صادق طبق الأصل
ابويا
انا جاي اصرخ في وشكم
واقولكم جميعا كلكم
اسمعوني وعوني
حقي عليكم تراعوني
مش من جنة بطن امي
لنار حياتكم تاخدوني
انا ببساطة ، يا أخوة يا
سادة
نتاج ارادة تحدي من
أمي للجميع لاجل
ابويا
وخروج فكرة للوجود
فكر فيها ابويا!
انا مش آخر العنقود
وباذن الله
راح يجي للدنيا كمان
اختي او يمكن أخويا!
عازم حضراتكم جميعا
على يوم سبوعي
اسمعوا عياطي وامسحوا
دموعي
يلا بسرعة وسعوا
المكان.
وقولوا ورايا جميعا
مرحب مرحب مرحب
راكان!
………..
