أشعار الشيخ امين الديب
سألنى أبنى النكلا يابا هيه أيه
عقلى سرح فى أيام بعيدة من زمان ..
أيام طفولتى فى قريتى
أيام ماكانت والدتى
تدينى نكله أشتريلها زيت وجاز
وكنت اشعر بامتياز
بين كل أولاد قريتى
لو خدتها مصروف فى عيد
واكون سعيد لو رحت مرة افكها اخد بدالها مليمين
واعمل لهم كيس من القماش
واحطه فى الجيب الشمال
ومرة فى الجيب اليمين
وأيدى تبقى الف ايد
وعينى تبقى الف عين
وقلبى جامد بالقوى زى الحديد
والخوف ما يعرف سكته
و اقتل قتيل..
ومعايا ادفع ديته
وفجأة
فوقنى الولد..سارح فى أيه .؟
انا قلتله لألأ مفيش
وسألنى يابا ما قلتليش
النكلا أيه..
رجعت تانى وقلتله
النكله جزء من الجنيه
أما الجنيه
كان يبقى مصروف آلف عيل م البلد.
فاكر ابويا أشترى أردب قمح وفاض ريال
من الجنيه
كان لما ابويا يشترى كسوة اخواتى
آلف رحمة ونور عليه
كان يشترى كل الكساوى ..
بالجنيه
كان القماش المتر منه بقرش صاغ
كان الجنيه بيجيب دهب ويجيب مصاغ
كان آلف مليم بالتمام
والنكلا كانت مليمين
قال ايه دا كله !!؟
يابا الجنيه عصفور فى ايديك
فجأة طار
يابا الجنيه زى السبرتو
لما طار
هو الجنيه يدوب يجبلك كيس فشار !
أو نص كيلو من الخيار
يابا الجنيه اصبح ركوبة للدولار
زى الحمار
وتقولى نكلا قريتى .. غيرها يابا
غيرها يابا الكل غير نكلته صبحت دولار
انا قولتله
ريحنى يا ابنى ف تربتى
وكتبتله فى وصيتى
أوعاك تغير نكلتك
بلدك أمانه فى ذمتك
أوعاك تغار
أوعاك تغيرها بدولار
أو حتى ميت مليون دولار
بلدك أمانه فى ذمتك
أوعاك تغير نكلتك
اشعار : الشيخ أمين الديب
