صفاء عودة
ليست مجامله ان يكون شعب عظيم
تعالو نعرف
تعرف المصرى من بين 1000 واحد؟!!
– لو سألت سواق تاكس أو حتى صاحب عربية على عنوان، وبدل ما يدلك قالك امشي ورايا.. يبقى مصري.
وعلى فكرة ساعات بيغير اتجاهه عشان عنده رغبة صادقة يوصلك وخايف تتوه.
– لو صليت في مكان، وبعد الصلاة اللي جنبك مد ايده وقالك تقبل الله .. يبقى مصري …
– إذا سمعت واحد بعد أن يضحك كثيرا يقول: “خير اللهم إجعله خير ” .. فتأكد أنه مصري …
– لو إتصلت بيه في التليفون، وقالك من غير مناسبة: “كل سنة وانت طيب” .. فتأكد أنه مصري …
– لما تقابل واحد وتسأله وعمره مايقول: “ما أعرفش” ده أكيد مصري …
ولما تكون ماشي بعربيتك في منطقة غريبة وتقف قدام قهوة تسال على عنوان تلاقي 4 بيردوا عليك في نفس واحد كل واحد بيشرح لك إزاي توصل .. أكيد دول مصريين …
– لما تنزل تلاقي واحد ساند على عربيتك واول ما يشوفك يضحك ويقولك لا موأخذه يا باشا .. ده اكيد مصري …
– لو دخلت عليه وكان بياكل ولو حتى عيش وبصل لازم يقولك اتفضل الأكل ويعيدها عليك ثلاث أربع مرات .. ده أكيد مصري …
– ولما تلاقي واحد ركبه بتخبط فى بعضها من الرعب و هو داخل القسم يعمل بطاقة الرقم القومى .. هو ده المصرى …
– ولما عربية تعمل حادثة فى الطريق الصحراوى أو الزراعى، وفى ثوانى تقف
خمسين عربية ينقذوا المصابين ويعدلوا العربيات وساعات بيشيلوهم من
على الأرض .. هم دول المصريين …
– لما تلاقي ناس بتقضي العيد فى المقابر مع حبايبهم اللي ماتوا يبقي .. تبقى انت أكيد في مصر …
– لما تلاقي سيدة في الرايحة والجاية عمالة تدعي لأولادها وتخلى الدنيا
تدعيلهم .. تبقى دي أم مصرية وطموحاتها وأحلامها فى الحياة إن ولادها يبقوا مبسوطين .. تبقى دى ست مصرية …
– لما تشوف واحد بيقف فجأة وهو ماشى فى الشارع ويمد ايده على حتة عيش مرمية على الأرض ويقوم رافعها لراسه قبل مايحطها جنب الرصيف .. يبقى ده مصرى …
– لما تشوف عامل أول ماياخد أجرته يقوم رافعها لراسه و يبص فوق ويحمد ربنا قبل مايحط الفلوس فى جيبه .. يبقى أكيد ده عامل مصرى …
– لما تلاقي واحد بيعد فلوس بصوت عالي ويبدأ بقوله الله واحد .. ومع الورقة الثانية: مالوش تاني، ومع الورقة الثالثة: العدد ثلاثة .. يبقي
أكيد مصري أبن مصري …
– لما تشاور لتاكس ويوقف لك فى نص الطريق عشان تركب حضرتك بمزاج يبقي أكيد السواق مصري …
– لما تيجي تدفع الأجرة لواحد أول مرة تعرفه، يحلف عليك تخلي .. يبقي اكيد مصري …
– لما تلاقي خناقة فى الميكروباس والأصوات عليت كل واحد فيهم بيحلف إنه يدفع للتاني ثمن التذكرة .. تبقى انت اكيد في مصر …
– لما تلاقي ست البيت بتحوش برطمانات المربي الفاضية سنين طوال بدون استخدام يبقي أكيد دي ست بيت مصرية …
– لما يكون فيه ضيوف بيسلموا عشان هيمشوا، وبعدين يقفوا على الباب يتكلموا ساعه يبقوا أكيد مصرين …
– لما تلاقى ناس شايلين أكياس من جميع الأشكال والألوان تحت المرتبه يبقوا أكيد مصريين …
– ولما تلاقى شعب فى أكبر أزمه بيمر بيها ما بينساش يضحك، ويطلع أفيهات حتى على نفسه، ويضحك اللى حواليه، وكل العالم يتكلم عليه، وعلى خفة دمه .. يبقى هوه ده الشعب المصري …
ويبقى أنت أكيد بتقصد أعظم شعب موجود على وجه الأرض .. اللي هو الشعب المصري …
تحيا مصر .. تحيا مصر .. تحيا مصر ..
