همسات فى أذن ملاحظي الثانوية العامة

المنيا : علاء سليمان

قام الاستاذ : على سيد عضو المتابعة الفنية بابوقرقاص بوضع أهم النقاط لملاحظى الثانوية العامة قبل وأثناء اللجنة وتتمثل فى :
اولا : على الملاحظ إحضار صورتين لخطاب الانتداب مع الأصل كذلك صورة بطاقة الرقم القومى له وأخيرا ورقة من المدرسة فيها أساسي الراتب الشهرى الذى يتقاضه
ثانيا : تعليمات داخل اللجنة
يركز ا/على سيد مسؤول المتابعة بابوقرقاص ان هناك تعليمات داخل لجان الملاحظة تتمثل فى الآتى :
– حضور اجتماع رئيس اللجنة قبل الإمتحان (يوم السبت 3يونيه ) لأن الاجتماع هيكون فيه التعليمات الجديدة الخاصة بالبوكليت
– اول ما تستلم أوراق الإجابة تعد الورق قبل تسليمه للطالب ولاحظ كل الورق مرقم بالأسفل
– تأكد من عدد الدبابيس في كل ورقة 2
– قبل تسليم الأوراق للطالب تنبه عليه يعد هو كمان ورقة الاجابة اللى يتسلمها
– يتأكد كل طالب أن ورقة الإجابة مكتوب عليها اسم المادة التى سيؤدي بها الامتحان ورقم النموذج
– تمضي على ورقة للإجابة بعد التأكد من بيانات الطالب وخاصة رقم الجلوس يكون واضح ليس به أرقام زائدة أو ناقصة أو غير واضحة
– زميلك في اللجنة يمضي بنفسه لكن في آخر 5 دقائق من اللجنة . إياك تمضي للملاحظ اللى معاك . ولا تجعله يمضي لك . واحد يمضي في أول 5 دقائق والآخر في آخر 5 دقائق .
– أثناء اللجنة يجلس أحدكم بالامام والآخر بالخلف ولا تتحدث معه طول اللجنة إلا إذا لزم الأمر ويكون الحديث قصير وبصوت منخفض
– لا تتحدث مع الطالب أو الطالبة في أسئلة الاختبار وماتعملش أبو العريف في كل مادة ولا حتى مادتك . لو الطالب حب يستفسر عن شئ استدعى رئيس الدور أو مراقب الدور .
– مفيش داعى كل ربع ساعة الوقت اللى عدى والوقت المتبقي لأن ده بيوتر الطالب وهو معاه ساعته ويضبط وقته . لكن تنبه في نصف الوقت بهدوء وقبل انتهاء الوقت بربع ساعة فقط .
-لا تصيح في وجه الطالب ولا تضيق من كثرة الأسئلة وكن بشوش لأن هذا يبعث طمأنينة للطالب
– في بداية اللجنة أجمع كل ما يخص المادة أو أي أوراق من الطلاب وشنط البنات وضعهم خارج اللجنة مش جوة اللجنة . الطالب يصطحب الأدوات فقط دون حقائب أو شنط
– هتنبه على الطلاب لو حد شطب يبلغك ولو أكثر من شطبين تعمل محضر شطب برقم السؤال والصفحة اللى شطب فيها . المحضر عبارة عن استمارة فيها اسم الطالب ورقم الجلوس ومكان الشطب ومكان توقيع للملاحظين ومراقب الدور . سهل مش صعب . لكن لو طالب شطب كلمة أو كلمتين عادي . لكن سطر أو جملة فما أكثر لازم تعمل محضر ويوضع المحضر بورقة الإجابة .
– لو الطالب عطشان و حب يشرب كوب مياه عادي لكن نبه عليه يبعد عن الورقة حتى لا يسكب عليها الماء .
– أهم نقطة . قبل أن يخرج الطالب من اللجنة عد ورقة الإجابة قبل أن تستلمها منه لربما يقطع الولد ورقة وانت مش واخد بالك وبعد كده هيقول انه كان مجاوب فيها والملاحظ قطعها .
– لو طالب قطع الورقة أو رفض الإجابة لازم تستدعي مراقب الدور . لأن اللى يحضر لازم يجاوب ويحل في الورقة .
– لا تسمح بالغش إطلاقا . ولا انت رايح تعمل ايه ؟. هي دي لب المهمة ومحور دور الملاحظ . وخلي بالك من الساعات الذكية ونظارات جوجل وسماعات البلوتوث
– لو تساهلت مع شخص بيغش هتلاقي طالب يشكي فيك لأنه مش عايز حد يكون احسن منه وده حقه . وإياك تخاف من الطالب مهما زاد حجمه فعقله لا يساوي شيئا بالنسبة لك كمعلم.
– أي شئ تحتار فيه أسأل مراقب الدور أو زميلك حتى لا تقع في أخطاء .
– لا تفصح عن تخصصك كمعلم دي كلها كام يوم ومش هتشوف الطلبة دي تاني يعني لن تستفيد من إعلان تخصصك إلا وجع الدماغ .
وتتمنى اسرة الجريدة التفوق لأبنائنا الطلاب ان شاء الله.