كتب السيد مفرح الجمل
نعيش فى ظل التقدم والتنمية المستدامة ولكن هيهات هيهات بيننا وبين ذلك طالما يوجد مسؤلين متقاعسين كل شغلهم الشاغل هو الراتب أخر الشهر فكل يوم نرى مأساة جديدة وكارثة كبرى تحدث فى قطار خط السنطة محلة روح حيث مجموعه من البلطجية يستحوذون على القطار ويقومون بترويع الامنين بل ويتهجمون على الركاب ويوقفون القطار من الفرامل الهوائية أثناء سيره بل ويشربون المخدرات بداخل القطار فهل هذا يليق بهيئة تعد من أكبر الهيئات بمصر فلم لا يتم وضع فرد امن من الشرطة بداخل القطار حتى يتم وضع حد لهذه المأساة المتكررة يوميا وتقول فتاة كانت بالقطار وارسلت للجريدة تستنجد بما رئت قائلة
سلام عليكم لو سمحت حصل النهارده موقف يرثي له بمعني الكلمه في قطر السنطه _محله روح اولا انا اول مره اعرف ان فيه فرامل هوائيه ممكن توقف القطر النهارده ف وسط مالقطر كان ماشي بين بلكيم والسنطه والاراضي طلع شويه شباب ماسكين ازايز غريبه خضرا كانوا قاعدين فيه فصلو الفرامل دي والقطر وقف وقفلوا باب العربيه وبالتحديد الاخيره الرجاله اللي قاعدين كبار ف السن وانا طالبه جامعيه قام راجل لسه بيقوله عيب يابني ماتكلمش جري عليه وكسر الازازه ع دماغه ماكناش شايفين غير دم ووقفوا ع الشبابيك وصفروا طلع من وسط الاراضي شباب بسكاااكين اقسم بالله وشعرهم طوويل ومنظر كأنه فيلم رعب احنا قلنا كده خلاص رايحين بس ساتر ربنا كان فيه ظابط ف العربيه اللي اودامنا مروح عاادي اللي ف القطر شافووه خاافوه ونزلو جري لزمايلهم المهم الظابط ماطلعش دنجوان ولا حاجه هما خافه من هيبته وهو لما جه ولقي الموقف كده دخل العربيه وقالنا اجرووووا وزقني وجري قبلي والله طبعا اللي تحت ف الاراضي قاعدوا يحدفوا ف طوب وشويه شباب الله يباركلهك وقفوا عالابواب يسدوها وفيه اللي اتصاب وداغه اتفتح غير الراجل الكبير
هو فيه ايه بجد هو احنا كده خلاص بقينا ف غابه رسمي لافيه امان اركب قطر ولا مواصلات وشباب وتحرش واشياء جميله بصراااحه اتقوا الله انا بعت الماسج كتحذير بس كان ممكن الي حصل ده يحصل بليل محدش هيبقي شايف كف ايده ةهتبقي كارثه جديده ….. لا والظريف ان بعد ماطلعنا اودام يقوم الظابط واقف ويقول للناس جريووا اودامي الكلاب
والله لو الواحد لو فيه اعصاب كان صور بس كان هيبقي مجرد تصوير ومحدش هيجي ع الاقل كل قطر يبقي فيه ظابط او امين شرطه ماهو اه الظابط له اسره وناس تخاف عليه بس معلش دي مهمته وشغلهم الله يعينهم يااارب ياكده ياهروح اجيبلي سكينه ولا مطواه واحطهم ف شنطتي جمب كشكول المحاضرات باللي شوفته لسه فيه مجرمين بتخاف من الشرطه اهو وياريت يتركب نور ف القطارات بعض العربيات لا وراعوا ربنا شويه ف البلد
فهل بعد تلك الرسالة ستجرى فى عروق المسؤولين بالهيئة النخوة والخوف على ركاب القطار من شباب ورجال واطفال وفتيات ام سيتركون الأمر وكأن شيئا لم يحدث
